Shillong, Nailur 22
Ka Hynñiewtrep National Youth Front (HNYF) Southern Border Area ha ryngkat ka jingïatreilang ki nongïalam ka Umpung Unit bad ki nongïalam ka Dangar Border Circle ki la leit ban jurip ïa ka jingkieng Umpung, ka jingkieng ban pynïakhlad ïa ka East Khasi Hills bad South West Khasi Hills District ban khang pyrshah ïa ki trok kit coke kiba kit palat pud.
Haba ai jingkren ha kane ka sngi, u nongïalam ka HNYF u Bah Kyllang Thongni u la ong, kane ka jingkieng ka long kum u budlum jong ka thaiñ South West Khasi Hills kaba dei ka jingkieng kaba pynïasoh ïa ka lynti ban leit sha ka shnong Balat, Ranikor, Mawsynram shaduh Shillong.
Shuh-shuh u la ong ba ka kynhun seng ka la leit ban ïakynduh ruh ïa u Executive Engineer jong ka PWD Road Mawsynram Division ban pan jingshai ha kaba ïadei bad ka jingkieng Umpung bad ïa ka surok.
Halor kane, na ka liang u Executive Engineer u la ong ba na ka liang ka Administration ka East Khasi Hills kala phah ïa ka hukum sha ka ophis u EE ka Mawsynram Division ba la pynjari ïa ka kyndon aiñ 163 BNSS kata ka long ba katei ka jingkieng kam long ban kit palat ïa ka 9 ton.
Na ka liang ka seng ka la ong ba ki nongñiah trok ki ju pynkheiñ ïa ka jingmana namar ba ki kit palat sha ki 15 haduh 20 ton.
Kumta u la ong ba na ka liang ka seng kam shong kli kti bad hashuwa ba katei ka jingkieng kan hap kan tor, ka seng ka hap ban tuklar shwa ban wan ka jingjynjar ïa u paidbah nongleit nongwan.
