Shillong, Nailur 22
Ka Synjuk ki Rangbah Kur ka Bri u Hynniewtrep ka pyntip ba kan pynlong ïa ka Dorbar Bah balai jong ki Rangbah Kur ha ka 27 tarik Nailur 2025 ha Dinam Hall naduh ka por 11:30 mynstep.
U President ka Synjuk u Bah R.L Kharpran u la ong ba ha katei ka jingïalang ka Synjuk kan pynlong ka jingjied ïa ki nongkitkam bathymmai na bynta ki lai snem bad yn pynskhem ïa ka riti synshar pynïaid kam ka synjuk.
Ka synjuk ka la khot ka wer ïa baroh ki Rangbah Kur ka Bri u Hynniew trep, ki khlieh nongshynshar, ki Syiem, ki Sordar bad ki Doloi ba kin ïawan ha kane ka jingïalang khnang ban ïoh ban ïa pyrkhat ïa ki kam ki ba bun syrtap.
U Saiñpyniar (Secretary) ka Synjuk, Bah Raphael Warjri u la ong ba ka long kaba donkam ban sngewthuh ha ka jingïakhun ban pynneh pynsah ia ka rukom kheiñ kur kheiñ kha, ban sngewthuh ïa ka tynrai namar lada sngewthuh ïa ka tynrai kan kham suk ban pynwandur ïa ki jinglong jingman ha ka imlang ka sahlang.
Ha katei ka sngi yn wan ban ïashim bynta ruh da u CEM ka KHADC u Bah Shemborlang Rynjah kum u kongsan bad u Syiem ka Hima Mylliem u Païem Ainam Manik Syiem kum u Symbud kongsan.
