Shillong, Nailur 23
Ka Jylla ka la khur saw tylli ki takma ha ka sngi kaba ar jong ka 36th East Zone Junior Athletics Championship 2025 kaba dang ïaid shaphrang ha Ranchi, Jharkhand.
Kine ki kynthup ïa ar tylli ki takma rupa bad rnong lyngba ka Tusame Marak, Damika R Lyngdoh, Rukini RT Dkhar bad u Renaldi Dhar.
Ha ka jingïakop mareh kaba 400M jong ki kynthei kiba hapoh 20 snem ka rta kaba la long ha ka sngi Ba-ar, ka Damika ka la khur ïa ka takma rupa hadien ba la la lah ban pyndep ha ki 59:73 sekhon. Kumjuh u Renaldi Dhar u la khur ïa ka takma rupa ha ka Long Jump jong kiba hapoh 20 snem ka rta da kaba u la lah ban kynthih ha ka jingjngai kaba 6.88 mitar.
Ha ka jingïakop kawang sum (javelin) jong ki kynthei kiba hapoh 18 snem rta, ka Tusame ka la khur ïa ka takma rnong hadien ba ka la lah ban kawang ha ki 35.04 mitar. Ïa kawei pat ka takma rnong la khur da ka Rukini RT Dkhar ha ka jingïakop mareh kaba 600 mitar jong ki khynnah kiba hapoh 16 snem ka rta hadien ba ka la lah ban pyndep ha ki 1:40.79 sekhon.
Haduh ka sngi kaba ar jong kane ka lympung, ka Meghalaya ka la khur mar lai tylli ki takma rupa bad rnong.
Kiwei pat kiba la khur ïa kitei ki takma rupa bad rnong ha ka lah sngi U Blei, ki long ka Sibilda Maring lem bad ha ka relay ba la khur da ka Damika R Lyngdoh, u Doniwell Langrin, ka Monlangki Kyndait bad u Jebirth Ch Momin.
