Shillong, Nailur 23
U nongaiktien ka All Khasi Meghalaya Tourist Taxi Association u Bah Balajied Jyrwa u la ïathuh ba la ai por artaïew ïa ka Sorkar ba kan pule ïa ki Polisi kiwei ki Jylla khnang ba kan sngewthuh ïa ki mat jingdawa ka Association.
U Bah Balajied Jyrwa u la ong ba ka jingïakynduh jong ki bad u Symbud Myntri rangbah ka long kaba seisoh bad kaba don jingkyrmen ba kin ïoh ïa ka jingdawa jong ki, hynrei kan kham shipor katto katne namar kan kham shem jingeh ïa ka sorkar ban kan shu thaw ïa ki polisi.
U la ïathuh ruh ba ïa ka komiti mynta yn shimti noh na ka tnad Transport hapoh ka jingpeit u Bah Sniawbhalang Dhar, namar ka tnad Tourism kam tip bha ïa ka jingdawa jong ka AKMTTA bad ka Association ka la ai por artaïew ba kan lum ïa ki jingtip haba ïadei ki polisi jong kiwei ki Jylla.
Hadien artaïew, kata ha ka 10 tarik u Risaw 2025 kin sa shong jingïalang biang bad ka Sorkar ban ïakren kham bha ha kaba ïadei ki Road Traffic Accident (RTA) ba la ïa pynlum pynlang na ka Sorkar bad na ka Association.
Ka AKMTTA ka la ai jingmut ruh ïa ka Sorkar ba kan ai ka jaka ïeng kali hapoh steshon rel bad ha kad liengsuiñ, ha kaba ka Sorkar haba ïadei bad kane kam pat lah ban ong eiei.
U Bah Balajied u la ong ka Association ka don ka jingkyrmen ban ïoh ïa ka jingdawa jong ki hynrei ïa kane ka kam hap ban ïaid katkum ka lynti ba kan nym don kano-kano ka jingïatyngkhuh bad ka aiñ bad ka long kaba donkam ban ïa sngewthuh jingmut bha hapdeng ka Sorkar Jylla Meghalaya bad ka Sorkar Assam.
U la ong ba lada ka urlong kane ka jingdawa, ka lah ban don ka jingktah katto katne ha kaba sdang hynrei hap ban ïaishah khyndiat.
