Nongstoiñ, Nailur 23
Ha ka sngi Ba-ar jong ka taïew, la lap noh ïa ka metïap jong kawei ka samla lud kaba la sdien phasi, hadien ba ka la jah la katto katne sngi bad khlem shym la wan phai ïing shuh.
Ïa kane ka samla kaba la duh noh ïa la ka jong ka jingim la tip kyrteng kum ka Iwanpynkmen Nongsiej, 14 snem ka rta na ka shnong Ksehkohlong ha West Khasi Hills.
Haba ïakren bad u Sordar ka shnong Ksehkohlong u Bah Ioanis Lyngdoh, u la ïathuh ba katei ka samla ka la mih na la ïing ha ka janmiet jong ka 20 tarik u bnai Nailur, 2025 hynrei naduh katei ka janmiet kan shym la wan phai ïing shuh.
Shuh-shuh u la ïathuh ruh ba watla kiba haïing hasem naduh katei ka sngi ba katei ka samla ka la jah ki la pyrshang ban wad hynrei ym shym la lap satia, hynrei dei tad ha ka 23 tarik u bnai Nailur, 2025 ha ki por 12 baje nohphai sngi ba ki katto katne ki briew kiba dang leit kheit tit ki la lap pynban ïa ka met jong katei ka samla kaba la sdien phasi ha kawei na ki tnat dieng ha kawei na ki jaka khlaw ïa kaba la tip kum ka khlaw Tangtadew kaba hap hapoh ka shnong Ksehkohlong.
U la ïathuh ruh ba hadien katei ka jingjia, ïa katei ka met jong ka samla la pynkit noh sha Civil Hospital Nongstoiñ ban pyndep ïa ka post-mortem ha shuwa ban aiti sha ki bahaïing hasem.
