Shillong, Nailur 23
Ka President jong ka India ka Droupadi Murmu, ka la sam ïa ki khusnam National Film Awards ba 71 hapoh ki thup bapher-bapher ha New Delhi ha ka sngi Ba-ar. Ka la ai ruh ïa ka khusnam Dadasaheb Phalke Award na ka bynta u snem 2023 ïa u Mohanlal.
Ha ka thup Best Feature Film ha ki ktien kiba lait na kito kiba don hapoh ka Schedule VIII jong ka Riti Synshar, ka khusnam Best Garo Film ka la leit sha ka Rimdogittanga. Kane ka phlim ka dei kaba la pynmih da ka Anna Films, Uncombed Buddha, bad Joicy Studio, bad la direct ne shna da u Dominic Megam Sangma. Kane ka khusnam ka wan bad ka Rajat Kamal bad ka song tyngka kaba T 2,00,000/- (iwei pa iwei). Ka phlim ka la ïoh khusnam na ka bynta ka rukom ïathuh khana shaphang ki jaka nongkyndong kaba don nongrim ha ki khana tang bad ka jingïapher jingmut ha ka imlang sahlang kaba peit ïa ka jingtieng, ki jingïathuh lypa bad ki jingïapher kyrdan ha ka imlang sahlang lyngba ki jingsngewthuh jong u khynnah uba dang 10 snem ka rta.
Ka National Film Awards ba 71 ka rakhe ïa ka jingtbit ha ki kam shna phlim ka India da kaba pynkup burom ïa ki nongshna phlim bad ki jingnoh synñiang jong ki sha ka kam saiñdur bad ka kam shna phlim. Mynta u snem, kine ki khusnam ki la ïoh pdiang 332 tylli ki jingtyrwa ha ka thup phlim, 115 tylli ha ka thup non-feature phlim, 27 tylli ki kot bad 16 tylli ki jingtyrwa na ki nongjurip.
Ha ka jingai jingkren, ka President ka la kitbok kitrwiang ïa ki nongjop ha ryngkat u Mohanlal, uba la ïoh ïa ka khusnam Dadasaheb Phalke Award. Ka la ong ba u Mohanlal u la pyni ïa ki jingsngew kiba jem tam na kiba jem bad kiba eh tam na kiba eh, bad u la pyni ïa ka sap kum u actor uba pura.
Ka President ka la kmen ban ïohi ba la shna ïa ki phlim ba don nongrim ha ki longkmie bad ba kine ki la jop ïa ki khusnam. Ka la ong ba ki longkmie ki shem jingeh katto katne namar ka jingduk, ka jingdonbor ki shynrang, lane ka jingpeit shiliang. Ka la ong ba ki phlim ba ïoh khusnam mynta ka sngi ki kynthup ïa ki khana shaphang ki kmie kiba ïalam lynti ïa ki khun jong ki, ki longkmie kiba ïaleh pyrshah ïa ki jinglong jingman ha ka imlang sahlang, ka jingeh ba ki longkmie ki ïakynduh ha ki longïing jong ki, ka imlang sahlang bad ruh ki khana shaphang ki longkmie ba shlur kiba kren shaphang ka jingïapher kyrdan hapoh ka jingdonbor jong ki rangbah. Ka la ïaroh ïa ki nongshna phlim kiba sngewthuh ïa kine ki jingshisha.
