Shillong, Nailur 23
U rangïalehkai ka Paris Saint-Germain, u Ousmane Dembele u la pynkut ïa ka snem da kaba u la jop ïa ka Ballon d’Or 2025, kaba long ka khusnam kaba kham kongsan hadien ba ka PSG ka la lah ban khur ïa ka nam lahduh ha ka Champions League.
Une u rangïalehkai ka France u la jop ïa u rangïalehkai ka Barcelona u Lamine Yamal ban shimti ha ka jaka u Rodri uba la jop ïa katei ka khusnam ha u snem 2024
U Dembele, 28 snem ka rta, u la ïoh ban lehkman hadien ba la pynkylla ïa u kum u rangïalehkai ‘centre-forward’ hadien ba u Kylian Mbappe u la leit ïasoh sha ka Real Madrid. U la lah ban thep haduh 35 kol ha baroh ki lympung ïalehkai, kaba la pynlong ïa ka PSG ban jop arsien hapoh ka ri bad ban ïoh ïa ka khusnam ba nyngkong jong ka ha ka Champions League kaba ka la ïai ap khmih lynti la slem. Ka jingjop ka la wan ha Munich, ha kaba ka PSG ka la lah ban pynliem ïa ka Inter Milan da 5-0 kol ha ka jingïakhun phainal.
“Ngam don kyntien ba ngan pynpaw. Ka la long ka samoi kaba phylla bad ka PSG,” ong u Dembele uba paw ba u don ka jingsngewkhia ha ka Theatre du Chatelet ha Paris. Une u rangïalehkai na France u la ai khublei ïa u nonghikai ba hakhmat eh u Luis Enrique, uba la rah ruh sha ïing ïa ka khusnam kum u nonghikai ba tbit jong ka klob jong u snem bad kum u kpa” ha kaba ïalam ban wanrah ka jingkylla ka jong u.
Watla u la rakhe ïa ka burom jong uwei pa uwei, u Dembele u la pynksan ïa ka bynta jong ka kynhun ha ka jingjop jong u: “Ka dei ka khusnam jong uwei pa uwei hynrei ka dei shisha ka kynhun kaba la jop ïa ka.”
Watla u la ïoh ban lehkmen halor katei ka khusnam, u Dembele u la pynksan ïa ka jingjop jong u na ka bynta ka kynhun: “Ka dei ka khusnam jong uwei pa uwei hynrei ka dei ka kynhun kaba la lah ban pynurlong ïa ka jingjop.”
Watla u Dembele u la jop ha ka liang ki shynrang, ka Aitana Bonmati na Spain ka la ïohpdiang ïa katei ka khusnam Ballon d’Or ha ka liang ki kynthei bad kaba long ka sien kaba lai, da kaba ka la jop ïa ka paralok jong ka, ka Mariona Caldentey.
Ka Bonmati, kaba 27 snem ka rta, ka la mih madan ha ka Euro 2025 watla ka Spain ka la shah rem ha ka phainal ha ka England, bad ka la ong ba ka jingbteng jong ka jingjop ka shong ha ki kynhun jong ka na ka bynta ka klob bad ka ri.
Ha kane ka jingïalang la ïohi ruh ïa u Lamine Yamal, uba dang 18 snem ka rta, ba un ïoh ban khur ïa ka Kopa Trophy kum u rangïalehkai ba kynsai ha ka sien kaba ar sien lynter. U nongap kol jong ka PSG, u Gianluigi Donna-rumma, u la rah sha la ïing ïa ka Yashin Trophy hashwa ba un leit sha Manchester City, katba ka Hannah Hampton na England, ka la shah jied kum ka nongap kol ba tbit tam jong ki kynthei. Ka nongïalehkai jong ka England ka Sarina Wiegman ka la ïoh khur ïa ka nam kum ka coach ba tbit tam jong ki kynthei.
Te kumta ka jingjop u Dembele ka la pynkut noh ïa ki jingbteng ban khur ïa ka khusam Ballon d’Or da u Lionel Messi, Cristiano Ronaldo bad u Rodri uba la ïoh ha u snem ba la lah.
