Shillong, Nailur 23
U Myntri ka tnad Public Health Engineering (PHE), u Marcuise N. Marak ha ka Sngi Ba-ar u la pyntip ba ïa ka projek sam umdih jong ka Greater Shillong Water Supply Scheme (GSWSS-III) la khmih lynti ban pyntreikam noh ha u bnai Lber jong u snem ban wan, bad ka kam kaba la pyndep haduh mynta, ka long kumba 70%.
U Marak u la pynpaw ba ka skhim sam um jong ka New Shillong Water Supply Scheme ka la sahteng namar ki jingeh ha kaba ïadei bad ka jingshim jaka, hynrei ïa kine mynta la lah ban pynbeit noh.
La khmih lynti ba ka jingtrei kan sdang noh pura ynda la sdang ka aïom treikam.
“Mynta la dep pynbeit lut ïa kiei-kiei baroh. Ka jingtei kaba pura kan sdang noh shen ynda la sdang ka aïom treikam,” u la bynrap.
