Shillong, Nailur 23
Ka 2nd Inter-School Shooting Championship 2025 ba la pynïaid da ka Shooting Association of Meghalaya (SAM) ka la poi sha kaba kut ha ka 21 tarik mynta u bnai ha shooting range jong ka Assam Regimental Centre, Happy Valley, Shillong.
Ki la don 29 ngut ki nongsiat suloi na kylleng ka Jylla kiba la wan shim bynta ha katei ka lympung, kynthup ïa ki nongshim bynta kiba duna ha ka bor ïohsngew, pynban ki la lah ban pyni ïa ki sap ïalehkai ba kyrpang jong ki ha ryngkat ka jingpynleit jingmut ha kane ka jingïalehkai.
Ka jingthmu jong ka SAM haba pynlong ïa katei ka lympung ka long ban kyntiew ïa kane ka jait jingïalehkai hapdeng ki skul bad ban pynsan ïa ki ha kane ka jingïalehkai.
Ki la don 17 tylli ki skul na kylleng ka nongbah Shillong bad Tura kiba la wan shim bynta na ka bynta ban pyni ïa ki sap ban kyrpang jong ki. Kine ki kynthup ïa ka Sherwood (Tura), APS Shillong, KV Happy Valley, All Saints Shillong, St. Edmund’s Shillong, KVS Laitkor, Synod School Jaïaw, HL Mizo SS, Laitumkhrah Presbyterian HSS, Umlyngka Presbyterian School, KV Upper Shillong, St. Mary’s Shillong, St. Ann’s SS Mawpat, School & Centre for the Hearing Handi-capped Children Shillong, Jyoti Sroat School, bad NIOS.
Katei ka lympung ka ai ka lad kaba bha tam na ka bynta ki nongïashim bynta ba kin pynpaw ïa ki sap ha kane ka jingïalehkai siat suloi bad khamtam eh na ka bynta ki khynnah kiba duna ha ka bor ïohsngew.
Haba ai jingkren ha katei ka sngi, u President bad u General Secretary jong ka SAM ki la pynpaw ka jingsngewnguh ïa ka Assam Regimental Centre kaba la pynbiang ïa ki jingdonkam bad ka jingkyrshan, da kaba ban jur ïa ka thong ban tei ïa ka nongrim kaba skhem na ka bynta ka jingïalehkai siat suloi naduh ki khynnah kiba dangrit.
Ha katei ka sngi la sam ruh ïa ki khusnam sha baroph ki nongjop bad na ka liang ka SAM ka la khmih lynti ba ki nongïalehkai kin nangkiew shaphrang ha kane ka jingïalehkai ha ki snem ki ban nangwan.
