Shillong, Nailur 23
U Vice President ka Federation of All School Teachers of Meghalaya (FASTOM) u Bah Sanborn Jungai u la ïathuh ba u Myntri ba khmih ïa ka tnad Pule-Puthi ka Sorkar Jylla u Bah Lahkmen Rymbui u la kyntait ban ai ïa kano-kano ka jingkular sha ki nonghikai.
U la ong ba ka Sorkar kan hap ban bishar shuwa ïa ki jingai jingmut bapher-bapher haba ïadei bad ka jingtyrwa ban pynbeit ryntih ïa ki kyrdan jong ki skul ha ka Jylla.
Ïa kane u Bah S.Jungai u la pyntip haba ïakren bad ki lad pathai khubor ha ka sngi Ba-ar jong ka taïew hadien ka jingïakynduh bad u Myntri Ka jingkhot u Myntri ïa ki nongïalam ka FASTOM ban ïakren kadei hadien ba ki nonghikai Adhoc ki la pynlong ïa ka jingïakhih da kaba shong kyllaiñ mungor ha madan Malki, kaba la sdang naduh ka sngi Nyngkong, ban dawa na ka Sorkar Jylla ba ka dei ban kyntiew kyrdan noh ïa ki skul Adhoc sha ki Deficit System/Pattern.
U Bah S.Jungai u la ong ba u Myntri u la kren shai ba ïa mynta hi un ym lah ban ai ïa kano-kano ka jingkular sha ki nonghikai, ban kyntiew kyrdan noh ïa ki nonghikai Adhoc sha ka Deficit System. Da kaba ong ruh ba u Myntri u la ïathuh sha ki, ba ka rai ban kyntiew kyrdan ïa ki nonghikai Adhoc sha ki Deficit kan shong hadien ka jingïalang bad ki kynhun bapher-bapher bad ka jingai jingmut jong ki bad kin sa rai pat.
Shuh-shuh u la ong ba na ka liang u Myntri u la pyntip ba ka Sorkar bad ka tnad ka ithuh ïa ka jingshakri bad u synñiang jong ki nonghikai Adhoc, hynrei haba phai sha ka jingdawa jong ki pat, ka Sorkar mynta kan dang bishar bniah shwa ïa ki jingai jingmut ba la ai da ki kynhun bapher-bapher, ba kynthup ïa ki seng saiñ pyrthei bad ki management committee jong ki skul.
“U Myntri ha ka jingïakynduh, um shym la ai kano-kano ka jingkular sha ngi, la ka Sorkar kan mynjur ne-em ban kyntiew kyrdan noh ïa ki skul Adhoc sha ki Deficit” la ong u Bah S.Jungai.
Haba kylli, u Bah Jungai u la ong ba ka FASTOM ka ïeng skhem ha ka nongrim, ban dawa kyntiew kyrdan sha ka Deficit System/Pattern, kaba kynthup ïa ka Basic Pay bad ka Dearness Allowances (DA).
“Ngi ïeng skhem beit ha ka nongrim, bad ngi kwah ba ïa kane ka jingeh ka jong ngi, ka Sorkar kadei ban pyndep noh” la ong u Bah S.Jungai.
U Bah Jungai u la ïathuh ruh ba ha ka jingïakren bad u Myntri ki la kyntu ba un sngewbha ban ïakren bad u Myntri Rangbah, namar lada shimkhia hi da u Myntri Rangbah, u ngeit skhem ba kine ki jingdawa kin long kiba seisoh.
Halor kane ka jingïakynduh bad u Myntri ka tnad pule puthi bad namar ba kim shym ïoh ïa ka jingkular kaba biang, baroh ki nonghikai Adhoc ki la rai ban dang bteng beit ïa ka jingïakhih da kaba shong kyllaiñ mungor ha madan Malki.
