Shillong, Nailur 23
Ka kynhun ki nongïaleh -kai ka Jylla hapoh ka lama jong ka Muaythai Asso-ciation Of Meghalaya, ki la wanphai sha la ïing ryngkat san tylli ki takma rnong ha ka IFMA Youth Mauythai World Cham-pionship 2025 bad la pdiang sngewbha da ki kmie ki kpa jong ki khynnah ha ka 22 tarik mynta u bnai na kad liengsuiñ kaba ha Guwahati.
Ïa katei ka lympung ïalehkai la sdang naduh 10 haduh 20 tarik mynta u bnai ha Abu Dhabi kaba ha kaba la wan shim bynta da ki nongïalehkai kiba kynsai na kylleng ki ri ka pyrthei.
Ïa ki takma rnong ha katei ka lympung, ka Dasngewtngen Immaculate Nongrum ka la khur ïa katei ka takma ha ka Waikru jong ka 34kg, kumjuh ka Mary Innocenthya Wriang ha ka 38kg bad ka Ailin Grace Kharbyrngar ha ka 40kg. Ka Dasngewtngen bad ka Ailin ki la khur biang ïa ka takma rnong ha ka Mai Muay.
Kumba ka paw kane ka jingleit shim bynta ka la long kaba jop namar katei ka synjuk ka la phah tang lai ngut ki ‘thei ïalehkai, pynban ki la lah ban wanrah burom ïa ka Jylla hi baroh kawei da kaba khur ïa kitei ki takma.
Lah ban kdew ba ki la don haduh 20 ngut ki nongïashim bynta na kylleng ki 14 tylli ki Jylla kiba la mihkhmat ïa ka ri India sha katei ka lympung ban shim bynta ha ki kyrdan ïalehkai bapher-bapher kum ka Combats, Waikru bad ka Mai Muay.
Nalor ki kmie ki kpa, la synran lang ha katei ka sngi ban pdiang burom ha Guwahati da u President ka Muaythai Association Ri Bhoi District u Bah Aiborlang Syngkli bad kiwei-kiwei.
U Bah A. Sun, Presi-dent ka Muaythai Asso-ciation Of Meghalaya, u la ai khublei ïa kitei ki khynnah kiba la lah ban pynpaw ïa ka jingtbit bad ban khur takma ha katei ka lympung bad u la ai ka jingkitbok kitrwiang ba kin dang ïai trei shitom shuh-shuh nangne sha-khmat na ka bynta kawei pat ka lympung ka ban sa long ha u snem 2026.
Shuh-shuh u President u la ai khublei kyrpang ruh ïa ki kmie ki kpa kiba la bei tyngka ïa ka jinglut jingsep na ka bynta la ki jong ki khun jong ki. Ka synjuk ka la ai khublei kyrpang ïa u Myntri Rangbah ka Jylla u Conrad K. Sangma, kumjuh ïa ka tnat ïalehkai bad ka MSOA kiba ju ai ka kti ka mon kti ka diang ïa ki lad jingïarap ïa ka synjuk nalor ki khusnam pisa kiba ka ju sam ïa ki khusnam pisa bad ki baibam na ka bynta ki nongïalehkai.
Ha kawei pat ka liang ka MTAM ka la rai ban pyn-kup burom ïa kitei ki nongjop ha ka 25 tarik mynta u bnai ha Indoor Sta-dium Hall Saiden kaba ha Nongpoh, Ri Bhoi District.
