Shillong, Nailur 23
Ka Dorbar Shnong Laban ha ka janmiet ka sngi Ba-ar kala pynkup burom ïa u MLA ka South Shillong Konstitwensi u Bah Sanbor Shullai hadien ba u la shah pynrung kum u Myntri ba thymmai ha ka Sorkar MDA-2.
U Bah Sanbor hadien ba u la shah pynrung kum u Myntri ka Sorkar Jylla, u la ïoh ban bat ïa ki tnat treikam kiba kynthup ïa ka Animal Husbandry and Veterinary, Arts and Culture, Printing and Stationary bad ka tnat Legal and Metrology.
Ïa kane ka jingïalang pynkup burom la pynlong ha Assam Club, Laban ha kaba nalor ki nongïalam shnong ka Dorbar Shnong Laban, la don ruh ki nongïalam Seng Kynthei, Seng Longkmie, ki nongïalam shnong na ki shnong bapher-bapher, ki dkhot jong ka BJP lem bad kiwei-kiwei.
Na ka liang ka Dorbar Shnong haba pynkup burom ïa u Bah Sanbor, ki la pynpaw ïa ka jingkmen ba sa shisien kum ka Konstitwensi kan ïoh biang ïa u Myntri hapoh ka Sorkar.
Haba kren ha kane ka sngi, u Bah Sanbor u la ai khublei ïa baroh ki Dorbar Shnong jong ka thaiñ Laban baroh kawei kiba la ai ka jingithuh ïa ka jingtreikam jong u na ka bynta ka bha ka miat jong ki paidbah ka Konstitwensi baroh kawei.
U Bah Sanbor u la ïathuh ba hadien ba u la shimti ïa ka shuki Myntri Sorkar, u la ïoh jingtip ba u la ïoh ïa ka mang tyngka kaba kot palat T.8 klur na ka bynta ban siang thymmai ïa ka surok rong naduh Civil hospital Point ter-ter shaduh St. John, Last Stop, Kenches Trace.
U la ong ba nalor ka mang tyngka ban siang thymmai ïa ka surok, u la lah ruh ban pynïoh pisa na ka bynta ban shna thymmai ïa ki nala um hapoh ka thaiñ Laban baroh kawei.
Nalor kane u la ïathuh ruh ba shen yn sa ïoh ruh ïa ka mang tyngka kaba T.1 lak ban shna pynbha ïa ka surok ha Hari Sabha Laban. “Baroh kine ki kam kin sdang hadien ka lehniam Puja,” u la ong.
Haba ai khublei ïa baroh ki trai jaka kiba la synñiang ei ka jaka na ka bynta ban pyntreikam ïa ki kam pynroi hapoh ka Konstitwensi, u Bah Sanbor u la ong, “Ka jingshakri paidbah ka dei ka jingshakri ïa U Blei namar kata to ïa duwai lem khnang ba U Blei un nang aibor ba ngan nang lah shuh-shuh ban shakri ïa ki paidbah bad ïa ka Konstitwensi baroh kawei.”
