Shillong, Nailur 23
Ka Synjuk ki Nongsynshar Shnong Par Umkhen ka la pynpaw ïa ka jingpyrshah jur ïa ka jingthmu jong ka Sorkar ban pynlong jaka theh ñiut ha Nonghali.
Ka jingthmu ban wan pynlong jaka theh ñiut ha kane ka thaiñ, kan ktah shibun kham tam eh haba ïa dei bad ka umbam umdih ruh.
Haba kren sha ki lad pathai khubor, ha ka 23 tarik u Nailur 2025, u President ka Synjuk u Bah Supar Rngaid u la pynpaw ïa ka jingbynñiaw ïa ka jingleh ka Sorkar, ban shim ïa kane ka rai, ban pynlong jaka theh ñiut ha Nonghali.
U la ong ba kum ki nongshong shnong kin pyrshah jur beit ïa kane ka jingthmu jong ka Sorkar, namar kan kthah ïa ka mariang bad ka umbam umdih.
“Ka kynhun kan sa phah da ka jingthoh ruh sha ka Sorkar” la ong u Bah Supar Rngaid.
U Bah Supar Rngaid u la kynnoh ruh ba ki nongshong shnong jong ka Shnong Nonghali ki la buh da ki ‘volunteer’ ban khang ïa ki ban rung bad ban ïa shim bynta ha ka ‘public hearing’, wat la na ka liang ki bor district ki la phah ïa ki jingpynbna bad khot ïa ki nongshong shnong ban wan ïa shim bynta.
U Bah Supar Rngaid u la ong ruh ba ki ‘volunteer’ kim shym la ailad satia ïa ki ban pynsngew ïa kaei kaba ki don bad kum kane kim lah ban pdiang satia.
Nalor kata, u la ong ba ka synjuk kan bteng ban pyrshah ïa kane bad kyntu ruh ïa ka Sorkar ba kan pynkut noh ïa kane ka projek, ban ïada ïa ka Wah Umkhen.
Na ka liang u Sordar ka Shnong Nonghali pat u Bah Hunboklang Mynsong u la kyntait mardor ïa ka jingkynnoh jong ka synjuk ki Nongshynshar shnong Par Umkhen, ba ki khanglad ïa ki ban wan ïa shim bynta ha kane ka ‘public hearing’.
U Bah Hunboklang Mynsong u la ong ba ki la shna ïa ka pandal kaba heh namar ki kwah ba baroh kiba wan kin lah ban rung hapoh jong ka.
“Kito kiba shah khang lynti ki dei ki riew shimet kiba don da ka wei ka jingthmu, kiba wan ym ban ïa shim bynta ha ka ‘public hearing’ hynrei ban thaw jingkulmar” la ong u Bah Hunboklang.
U la ong ruh ba kaei kaba pynlong ïa ki ban wan rah paidbah na ki 15 tylli ki Shnong ki bym don bynta eiei bad kane ka projek lada ki kwah ban kren ki nongïalam ki dei ban wan khlem da leh politik ïa kane ka ‘public hearing’.
U Sordar u la bynrap da kaba ong ba ka Nonghali ka la pule bha ïa kane ka projek ha shuwa ban mynjur ban pdiang ha ryngkat ka kular ba ka Wah Umkhen kan ym shah ktah satia.
“Kan ym long kum ka Marten ha Mawlai, kaba kylla long ka jaka ba jakhlia namar kam shym la don ka plan kaba biang bad ka jaka kaba rit.
Ka Nonghali ka don ïa ka jaka kaba 200 akar bad kin leh ruh da ki kor ki bor jong kane ka juk mynta” la bynrap shuh-shuh u Bah Hunboklang.
Nalor kata, u la ong ba ka ‘public hearing’ ka la ïaid beit ïaid ryntih khlem ka jingthut, ha kaba kiba pyrshah bad kiba shah ki la pynpaw ïa la ki jong ki jingpynsngew khlem ka jingpynthut.
