Jowai, Nailur 23
Ka lympung ïalehkai 1st Division Football Tournament (Hajan Shylla Memorial Trophy) ba la pynïaid da ka Thadlaskeiñ Sports Association ka la sdang ha ka sngi Ba-ar ha Multi Sports Complex kaba ha Wahïajer ha kaba ki la don 16 tylli ki kynhun kiba la wan shim bynta.
Ha kane ka jingïalehkai, ka Jalapang SC ka la khur ïa ka jingjop hadien ba ka la pynliem noh ïa ka Evergreen da 2-1 kol. Ïa kine la thep da u Kynmaw Phawa ha ka minit kaba 33 bad u Marlangki Suting (67), katba na ka Evergreen la pynphai kylla shi kol da u Rishkhem Shylla (43).
Shwa ïa kane ka la don ka jingïalang lyngkot ba la pynïaid da u bah Everist Pariat, Chairman Tournament Committee, bad la ïoh ka jingkren lyngkot na u President ka TSA u Bah Kmenlang Shylla, kumjuh na u Bah H. Shylla uba dei u khun ka (L) Hajan Shylla.
Ïa kane ka lympung ïalehkai la plie da ka Kong Rimiful Shylla kaba dei ka khun nyngkong ka (L) Hajan Shylla.
