Shillong, Nailur 23
Uwei u kontraktor ryngkat ki Engineer ka tnat PHE bad ki Inspector Third Party ba dei khmih ïa ka skhim JJM, kila shah mudui ejahar halor ka jingkynnoh bamsap bad trei bym hok ïa ka skhim JJM ha ka shnong Gare Songmong bad ki shnong ba marjan.
Ïa ka ejahar la mudui da uwei u nongshong shnong ka Gare Songmong, South Garo Hills u Tengba Marak, uba la leit buh ïa kane ka ejahar ha thanad Nangalbibra ha ka sngi Ba-ar.
“Nga kyrpad ba phin register ïa kane ka ejahar pyrshah ïa kine ki briew ba kynnoh, pynlong ïa ka jingtohkit kaba bniah bad ban leh da kaba tyngeh katkum ka aiñ,” ong u Tengba Marak.
U Tengba u la kynnoh, “Ba hapoh ka skhim ka Sorkar Jal Jeeval Mission (JJM), ïa ka projek sam um bam la mang bad pyntrei ha ka shnong Gare Songmong bad ki shnong ba marjan, hynrei, u kontraktor, ha ryngkat ka jingïasuhbuit bad ki briew ka tnat PHE Williamnagar bad u Inspector Third Party, kila ïa bam klop ïa ka pisa bad trei bym hok ïa ka projek”.
U la kynnoh ruh ba ki pipe ba la siang ki dei kiba tad dor, ki jingtei kiba shu shna torti bad bun ki longïing kim pat ïoh ïa ka kor um ha ïing watla ka PHE kala dep ban ai ïa ka syrnot bala pyndep ïa ki kam. U la kynnoh ba ïa ka pisa ba la mang da ka Sorkar la pyndonkam bakla bad ka jingpyntrei ïa ka projek ka long tang ha ki kot ki sla hynrei ki paidbah kim pat ïoh satia ïa ka umbam umdih.
U Tengba u la kdew ruh ba ki top um ba la pyntrei la shu ieh khlem um bad ka ktieh bad u shyiap u la dap ha kane ka top bad la ïohi ruh wat ïa ki ñiut kiba la mih hapoh. U pyntip ba naduh ba dep shna ïa kane ka top, kam pat ju poi um satia.
“Kine ki briew kila phah soi kyrteng ïa ki nongshong shnong ba kin ïoh sei ïa ka pisa khlem da ïaid katkum ka lynti kaba dei,” u la kynnoh haba ban jur “Kane ka pyni shai ïa ka jingthmu bamsap, leh thok, shet shukor bad pyndonkam bakla ïa ka pisa u paidbah da une u kontraktor, ki briew ka PHE bad u Inspector, kiba dei ban shah pynsajia katkum ka aiñ”.
