Shillong, Nailur 23
Ka jingsiew kaba palat T.700 klur ka dang sahteng na ka bynta ki projek jong ka Jal Jeevan Mission (JJM) ha Meghalaya.
Haba pyntip ïa kane ha ka Sngi Ba-ar, u Myntri ka tnad Public Health Engineering (PHE), u Marcuise N. Marak u la ong, “Ha kaba ïadei bad ka jingsiew, ngim pat siew kumba T.700 klur – ka jingsiew kaba sahteng.”
Hynrei, u la pynshai ba kane kam dei namar ka jingbym leh eiei jong ka Sorkar Jylla, hynrei ka dei namar ka jingpynslem ha ki rukom treikam ha ka kyrdan jong ka Sorkar Pdeng.
“Kam dei namar ka Sorkar Jylla, ka dei namar ka Sorkar India namarba ki don katto-katne ki rukom treikam. Ka Sorkar India ka donkam ban shim ïa ka rai namar la buh thong ha ka 31 tarik u Lber, 2024 bad hadien kata, ka Sorkar India kam shym la shim ïa kano-kano ka rai,” la ong u Marak haba pynbna ba ka Sorkar India ka la pynjlan ïa ka jingai por jong ka JJM sha u snem 2028.
U Myntri u la pyntikna ruh ba ïa ka pisa ba la buh kyrpang yn sa pyllait noh sha ka Jylla ynda la dep ka jingpeit bniah – khnang ban lah ban siew pat sha ki kontraktor.
“Kumta, mynta ka Sorkar India ka hap ban pyllait ïa ka pisa kaba ki la dep ban buh kyrpang na ka bynta ka tnad Jal Shakti bad katkum ka jingbthah jong ka tnad pla tyngka, ka jait jingpeit bniah kaba dang ïaid shakhmat bad ka tnad Jal Shakti shisien ba la pyndep ïa ka jingpeit bniah, yn sa pyllait ïa ka pisa sha ka Jylla bad ynda la pyllait ïa ka pisa, ka jingsiew kan sa sdang,” u la ong.
U Marak u la pdiang ba ka jingsiew kaba dang sahteng ka la ktah ïa ka jingtrei ha ki katto-katne ki projek, ha kaba ki kontraktor kiba tbit ki dang bteng ban trei katba kiwei pat ki la sangeh noh ïa ka jingpyntreikam namar ka jingduna pisa.
Shuh shuh u la pynpaw ïa ka jingsngewthuh halor ki jingeh kiba mad da ki kontraktor bad pyntikna ba la pyrshang ban pynbeit ïa katei ka jingeh.
