Nongpoh, Nailur 23
Da ki hajar ngut ki paidbah nongshong shnong jong ka thaiñ Killing ki la mih paidbah ha ka sngi Ba-ar ban pynpaw ïa ka jingpynrem bad pyrshah jur halor ka jingwan tuklar bad mushlia jong uwei na ki nongshong shnong ka Jylla Assam ïa ki jaka puta kiba hap hapoh ka Jylla Meghalaya da kaba ujor mukotduma sha ka ïingbishar ba khliehduh ka ri, ka Supreme Court. Kane ka jingïalang ka dei kaba la pynlong da ka All Killing Durbar Comm-ittee kaba kynthup ïa khatar tylli ki shnong.
Utei u nongshong shnong ka Jylla Assam uba la leit ban ujor sha Supreme Court ïa ki jaka jong ka Jylla Meghalaya, u dei uba la tip kyrteng kum u Jitul Deka. Lyngba katei ka jingujor u Jitul Deka, ka Supreme Court kala dep ban thung da ka Central Empowered Committee (CEC) kaba la pyndep ïa ka jingsor jamin bad aiti ïa ka kaiphod ai jingmut jong ka sha ka Supreme Court. Kawei na ki jingai jingmut ka CEC kaba la pynbitar ïa ki paidbah nongshong shnong ka dei halor ka jinghap ban pynkylla khlaw biang ïa kiba bun ki jaka.
Kane ka jingïalang kaba la pynlong ha madan jong ka shnong Jorbil, la sakhi ruh ïa ka jingwan ïashim bynta naduh u Bah Sosthenes Sohtun, Myntri ka Sorkar Jylla, u Bah Charles Marngar MLA ka Mawhati, u Bah Damanbait Lamare MLA ka Umroi, ka Kong Rona Khymdeit MDC ka Nongpoh, u Bah Ngaitlang Dhar, MLA barim ka Umroi, u Paiem Ken Syiem, Syiem ka Raid Marwet, u Bah A Nengnong Myntri ka Hima Mylliem, u Bah Banbuhai Makdoh Chairman ka Synjuk ki Rangbah Shnong Ri Bhoi nalor ki nongïalam jong ka RBYF, FKJGP bad kiwei-kiwei ki riew pawkhmat ka thaiñ.
Na ka liang ki nongkren ha kane ka sngi ki la pynpaw ïa ka jingpynrem jur pyrshah ïa ka jingwan tuklar bad mushlia jong utei u nongshong shnong ka Jylla Assam pyrshah ïa ki jaka puta jong ki paidbah nongshong shnong ka Jylla, kaba ki la ong ba ka long kaba beaiñ, kat haduh ba ki paidbah nongshong shnong ka thaiñ kin duh thiah duh dem bad kaba lah ruh ban wanrah ïa ka jingthut ha ka shongsuk shongsaiñ.
Ki la pynpaw ruh ba ki jaka ha Meghalaya ki dei kiba la long trai da ki paidbah nongshong shnong, ki Hima ki Raid bad kim dei satia jong ka Sorkar kumba long ha ka Jylla Assam bad ba ka Jylla Meghalaya kam pat ju tuklar satia ïa ki jaka jong ka Assam, balei ki nud ban wan tuklar ïa ki jaka jong ka Meghalaya? la buh jingkylli kitei ki nongkren.
Halor ka jingkynnoh ba ka jingshlei um jong ka sor Guwahati ka dei namar ka jingtih khyndew, ka jingtih maw ha katei ka thaiñ, ki nongkren kila ong ba ka jingshlei um ha ka sor Guwahati kam dei shuh kaba dang thymmai, hynrei kaba la ju jia naduh ki por kiba mynshwa bad kynthoh kylla ba katei ka jingkynnoh pyrshah ïa ka Meghalaya ka dei ka bym don nongrim haei-haei ruh, hynrei ka jingbishni ïa ki kam khaïi pateng jong ki paidbah nongshong shnong ka Jylla.
Ki nongkren ba kynthup naduh u Myntri Sorkar, ki MLA bad MDC bad kiwei-kiwei ki la pynpaw ba kin nym aili satia ïa kane ka jingwan tuklar utei u Jitul Deka bad kular ïa ki paidbah nongshong shnong ba kim dei ban tieng ban syier naba kin don ha syndah bad ki paidbah ban ïakhun haduh kaba kut ban ïoh ïa ka jingjop pyrshah ïa katei ka mukotduma bad ba ki paidbah kin ïoh ban im laitluid bad imsuk im saiñ biang ha la ka jong ka ri.
Ha kane ka sngi, da ka jingbitar, ki paidbah kila pynlong ruh ïa ka jingthang ïa ka tyngshop jong utei u Jitul Deka kum ka dak jong ka jingpynrem jur halor ka jingwan mushlia bad wan tuklar ka jong u, ïa ki jaka puta kiba dei jong ki paidbah nongshong shnong ka Jylla Meghalaya.
