Shillong, Nailur 23
U State Working President ka NPP, uba dei ruh u Myntri Sorkar, u Marcuise N. Marak u la ïaroh ïa u Myntri Rangbah ka Jylla, u Conrad K. Sangma halor ka jinglah jong u ban pynneh ïa ka jingïabiang lang ha ka jingmihkhmat, da kaba ai lang ïa ka bynta kaba kongsan sha baroh ki paralok kiba ïadonlang ha ka Sorkar Meghalaya Democratic Alliance (MDA).
Haba kren sha ki lad pathai khubor ha ka Sngi Ba-ar, u Marak u la kdew ba watla ka seng ka don 33 ngut ki MLA, hynrei u Myntri Rangbah u la bat la ka kular jong u ban pyntikna ïa ka jingmihkhmat na ka bynta ki seng kiba kham rit ha ka Sorkar kiba kynthup ïa ka Hill State People’s Democratic Party (HSPDP) bad ka United Democratic Party (UDP).
“Da kaba buh jingmut ïa kane, nga ong hooid ka dei ka jingmihkhmat kaba ïahap bad kaba biang lang,” u la ong da kaba bynrap “Baroh ki tip ba ka Sorkar Synrop ka donkam ban ïabiang lang. Da kaba buh jingmut ïa kane, watla ka la don khyndiat kane-katai, hynrei mynta baroh ki la ïa biang.”
Katkum ka jingong jong u, kane ka la ïarap ban pynroi ïa ka jingsngew ha ka ban ïatreilang hapdeng ki paralok ba Synrop lang.
U Marak u la pyntip ruh ba u Myntri Rangbah u la bthah ïa baroh ki MLA na ki seng ka Liang Synshar ban shim ïa ka jinglong trai ha la ki konstitwensi jong ki, da kaba treikam kum ki Myntri Rangbah ha la ki jong ki jong ki jaka.
“Namarkata, kam don jingkylli halor ka jingbym hun ne kaei-kaei namarba u dang lah ban peit ïa ka konstitwensi lajong ha ryngkat ka jingkitkhlieh kaba pura. Ngi burom ïa ki, kano-kano kaba ki kyrpad ngi mynjur ïa kata. Kumta kam don ka jingkylli halor ka jingbym hun ne kaei-kaei,” u la pynpaw.
Haba ïadei bad ka jingmihkhmat ha ka Kynhun Myntri, une u nongïalam ka NPP u la kdew ba u Myntri Rangbah u la shim ïa ka rai da kaba buh jingmut ïa ka jingdon ki MLA na Ri-Bhoi distrik. Da ka jingdon jong 4 ngut ki MLA na ka distrik, u Myntri Rangbah u la pyntikna ba ïa ki sur jong ki, la sngap kumjuh ïa ki jingdonkam jong ki la pynbiang.
