Shillong, Nailur 24
Hadien ka jinghiar shuki noh jong u Bah Shemborlang Rynjah na ka kam Chief Executive Member (CEM) jong ka Khasi Hills Autonomous District Council (KHADC), kumta ka jingtreikam jong ka Executive Committee (EC) ruh ka la kut lang noh syndon tad haduh ban da thaw ïa ka EC kaba thymmai da u CEM ba thymmai.
Katkum ki kyndon aiñ jong ka AD Rule, ka ong haba u CEM u la iehnoh kam, ka EC kam lah ban treikam shuh kaba mut ka la kut lang. U Lat un hap thung ïa u caretaker CEM ban pynïaid ïa ki kam jong ka District Council.
Kumba ka long mynta ka jingtreikam jong ka Khasi Hills Autonomous District Council (KHADC) ka long khlem ka Executive Committee (EC) kata hadien ka jingiehnoh kam jong u Bah Shemborlang Rynjah na ka shuki CEM.
Hapoh ka Rule 21(2) jong ka Assam and Meghalaya Autonomous Districts (Constitution of District Councils) Rules, 1951, shisien ba u CEM u la hiar shuki, kumta ka jingtreikam jong kiwei ki dkhot jong ka EC ruh ka la kut noh syndon bad kim lah shuh ban treikam. Kumta donkam ban thaw noh ïa ka EC ba thymmai katkum ki kyndon jong ka Rule 20, kaba aibor pat ba ïa u CEM ban jied da ka District Council, katba ïa ki Executive Member pat la thung da u Lat ha ka jingai jingmut jong u CEM.
Haba kylli, na ka liang u Chairman ka KHADC u Bah Strong Pillar Kharjana u la pynthikna ba ka Council mynta ka treikam khlem ka EC. “Ngin ap ïa ka jingai jingmut jong u Lat halor ki lynti ba shakhmat ynda u la pdiang ïa ka shithi iehnohkam,” u la ong.
U Lat u lah ruh ban kyrpad ïa u Bah Shemborlang Rynjah ban shimti pynïaid shipor ïa ki kam ka Council kum u ‘Caretaker CEM’ tad haduh ban da jied da uba thymmai.
U Chairman u la pyntip ba ïa ka dorbar ba kyrpang jong ka Council yn sa khot pynlong da u Lat na ka bynta ban pynlong ïa ka ilekshon jied CEM ba thymmai, ha kaba ki kyrtong kin hap ban thep kyrteng ban ïakhun ïa ka shuki CEM kaba la sah thylli mynta.
