Shillong, Nailur 24
U Symbud Myntri Rangbah ka Jylla ba peit ïa ka tnad kam pohïing, Bah Prestone Tynsong u la bthah ïa ka Special Investigation Team (SIT) ba kan pynlong ïa ka jingtohkit kaba bniah halor ka jingjia kaba la ïalam sha ka jingkhlad ba sngewsih (ba dang shen) jong i heprit Insaphira Lyngdoh Mawnai ba dang saw snem ka rta ha Nongrah-Nonglum.
Katkum ka jingong jong u, donkam ban sei madan ïa ki jinglong-jingman haba ïadei bad ka jingïap jong i heprit Insaphira bad ban tip balei ba uta u khynnah uba dang 13 snem ka rta um shym la pyntip mardor shaphang kane ka jingjia.
“Nga la dep bthah ïa ka SIT ban ngam jylliew shuh-shuh ba balei kata ka jingjia kaba sngewsih ka la wan jia bad balei ba uta u khynnah um shym la pyntip mardor shaphang kane ka jingjia. Balei u la sngap jar bad leh kum bym tip eiei,” la ong u Bah Tynsong haba kren sha ki nongthoh khubor.
“Kumta ka kynhun ka dang ïaid shakhmat ban lap shuh-shuh ïa ki jingshisha kiba kham jylliew ha kaba nga hi nga sngew, la ki don kano-kano ka jingbuhrieh hangne-hangtai,” u la bynrap.
Ha ka 18 tarik u Nailur, ïa utei u khynnah ba dang 13 snem ka rta, uba dei u para marjan – uba ju wan jngoh barabor ïa ka longïing jong itei i heprit, la leit rah hakhmat ka Juvenile Justice Board (JJB) hadien ba u la kam ba u la ïalam ïa itei i heprit sha kawei ka jaka ba dang shna ïing kaba don hajan, na kaba la lap ïa ka met jong i ha ka 15 tarik u Nailur.
La ïathuh ba i heprit Insaphira Lyngdoh Mawnai i la jah rngai na ïingsah jong i ha ka por 8 baje mynstep jong ka 14 tarik u Nailur.
Ka jingtohkit jong ki pulit, kaba la ïalam da ka SIT bad khlieh da u SP (City), Bah Herbert Kharkongor, ka la lap ba utei u khynnah u la ïalam ïa itei i heprit sha katei ka jaka ba dang shna ïing, ha kaba u la btuid bad tan lang ïa itei i heprit, kaba la ïalam pat sha ka jingjia ryngkhat (aksiden) ha ka jingngam jyllop jong i.
Ka kaiphod jong ka ‘Post-Mortem’ ka la pyntikna ba ka daw jong ka jingïap ka dei namar ka jingngam jyllop, khlem kano-kano ka sabut ba la don ka dak jingmynsaw ne jingshah thombor.
Ha ka jingtohkit jong ka SIT, utei u khynnah u la phla ba u la ïalam itei i heprit sha katei ka jaka bad u la pyrshang ruh ban pynthut ïa ka jingmut-jingpyrkhat da kaba thaw khana shaphang kawei ka kali ‘Scorpio’ ba ïong bad ki shynrang kiba kah durkhmat.
