Shillong, Nailur 24
Ka Khasi Students’ Union (KSU) Eastern Central Division ka la aiti da ka jingthoh ha u Myntri ka tnad ka koit ka khiah u Bah Wailadmiki Shylla ban dawa pynïoh kali kit nongpang ha Diengpasoh PHC bad buh Doktor ha Jongksha PHC.
U Bah Elas Umsong President ka KSU Eastern Central Division u la ïathuh, kumba ka long mynta haba donkam ban kit nongpang na Diengpasoh PHC sha Shillong, hap kit da ki taxi kamai bad na ka liang u Myntri ba dei peit ka tnad ka koit ka khiah u la kular ban pyndep ïa kane ka kam.
Shuh-shuh u la ïathuh ruh ba ki la ïoh ban pynpaw halor ka jingduna ki nongtrei bad ki doktor hapoh ka Jongksha PHC ha kaba katei ka jaka ai jingsumar ka hap ban peit palat sawphew hynniew hajar tam ka jingdon ki nongshong shnong, katba haba ïadei ka jingdon ki doktor, ki nongtrei ka duna palat bad pynpaw ruh ïa ka jinglyngnoh ba u doktor uba don ha katei ka PHC u dang hap pat ban peit sa kiwei pat ki jaka ai jingsumar ka thaiñ.
U Bah Umsong u la ïathuh ba ha Jongksha PHC donkam kumba lai ngut eiei ki doktor ban peit nongpang namar ba katei ka jaka ai jingsumar ka la don 25 jingthiah bad halor kane ka jingdawa, u Myntri ka tnad ka koit ka khiah u la kular ban shimkhia ban lah ban thung doktor noh kham kloi.
