Shillong, Nailur 24
U MLA ka North Shillong Constituency u Bah Adelbert Nongrum uba la shah sospon na ka seng VPP, u la ujor pyrshah ïa ka jingpyndonkam khlem jingbit ïa ka jaka Sorkar ban pynlong ka jaka kamai ha ka jaka ba la ai sha ka Civil Service Officer Housing Society Ltd ha New Shillong Township.
Ha ka jingmudui ba la ai sha u Secretary ka tnad Urban Affairs, u Bah Adelbert u la ai por 30 sngi ïa ka tnad ba kan ai jubab da ka jingthoh, ba batai bniah ïa ki sienjam ba la shim bad lada kim lah ban leh kumta un sa shim da ka lynti ban mudui mukotduma.
U Bah Adelbert u la kynnoh ba ka jaka ba la ai sha ka Civil Service Officer Housing Society Ltd, la pyndonkam kum ka Institute Guest House na ka bynta ka Indian Institute of Management Shillong kaba pynkheiñ ïa ki kyndon ai jaka.
Katkum ka jingong jong u, ka jubab ïa ka jingkylli ba la wanrah ha ka ïingdorbar thawaiñ ha kane ka Dorbar Synrai ba dang shu dep shen, u Symbud Myntri Rangbah ba peit ïa ka tnad Urban Affairs u la ai ïa ki jingtip ba pynthikna ba la pynïaid ïa ka IIM Shillong Institute Guest House na ka Building ha ka Lum Jingsuk Homes, New Shillong Township, Mawdiangdiang, kaba la ai ha ka kyrteng jong u Bah DP Wahlang (Ban shna ïingsah).
U Bah Adelbert ula kdew ba ka ‘Deed’ ban aiti/shimti ïa ka No.MUDA.14/2007-08/15 ba 20 tarik Jymmang 2009, la kren shai ba ïa kane ka jaka dei ban pyndonkam thik tang ïa ka kam ba la buh.
“Na ka jingpeit ïa ki jingshisha bad jingeh kiba lah kdew haneng, Nga lah ujor ïa kane ka jingujor na ka bynta ka jingmyntoi u paidbah, ba ïa ki jaka Sorkar ym dei ban ailad ban shah pyndonkam bakla khlem ïoh jingbit. Ka long kaba la shai kdar na kawei ki kyndon ba la kdew haneng katkum ka kot jingaiti ba ïa ka khyndew jaka dei ban pyndonkam tang na ka bynta ki jingthmu ba lah dep pynbeit lypa, kumta nga kyrpad ïa ka tnad Urban Affairs ka Sorkar Jylla Meghalaya ban shim ïa ki sienjam ba donkam ban pynsangeh noh ïa ka kam khaïi pateng ba la pynïaid ha ka lyngkhot khyndew ba 27 ha Lum Jingsuk Homes, New Shillong Mawdiangdiang”, la pynpaw u MLA ka North Shillong ha ka jingthoh.
Kumta u Bah Adelbert u khmih lynti ban ïoh ïa ka jubab na ka tnad Urban Affairs bad na ki bor ba halor ha shuwa lane hapoh ki 30 sngi ba la phah ïa kane ka jingujor.
