Shillong, Nailur 24
U Bah Shemborlang Rynjah uba dei u MDC ka VPP na Langkyrdem-Laitkroh ha ka sngi Balang u la hiar noh na ka shuki kum u Chief Executive Member (CEM) ka Khasi Hills Autonomous District Council (KHADC).
Ka jinghiar shuki noh jong u CEM ka la wan jia tang hadien 7 bnai ba ka VPP ka la shimti ban synshar ïa ka Executive Committee jong ka Council.
“Nga thoh ban pyntip sha phi ba ngan hiar shuki noh na ka kam Chief Executive Member jong ka KHADC ha kane ka sngi ka 24 tarik Nailur, 2025. Hadien ka jingïakren kaba sani bha, nga la poi sha kaba pynkut ba namar ka jingdon ka jingshitom, bad kumta na ka bynta ka bit ka biang jong baroh lang kata na ka bynta ka koit ka khiah jong nga bad kumjuh ruh jong ka ophis, nga la rai ban hiar shuki noh,” la ong u Bah Shemborlang ha ka shithi iehnohkam kaba u la aiti sha u Chairman jong ka KHADC u Bah Strong Pillar Kharjana.
Ha kaba ïadei bad kane ka jingiehnoh kam, u Nongaiktien ka VPP bad u Executive Member (EM) Bah Powell Sohkhlet u la pyntip ba u Bah Shemborlang u la aiti ïa ka shithi iehnoh kam sha u Chairman jong ka KHADC, Bah Strong Pillar Kharjana haba pyntip ba ka dei na ka daw ba um don hapdeng ka met kaba koit ba khiah.
Namar kane ka jingjia, u Bah Powell u pyntip ba ka Parliamentary Party jong ka VPP kan sa shong jingïalang shen ban shim rai halor ka ilekshon sha ka shuki CEM ba thymmai ka KHADC.
U Bah Shembor u la shah jied khlem kano-kano ka jingïakhun pyrshah ha ka ilekshon CEM ba long ha ka 28 tarik Rymphang.
“Wat lada ngim sngew lah ban pdiang ïa kane ka jinghiar shuki jong u, hynrei haba ngi pyrkhat pat ïa ka koit ka khiah, ngi la pdiang bad burom ïa kane ka rai jong u ryngkat ka jingduwai bad kitbok kitrwiang ba un ïoh noh ïa ka met ba koit ba khiah,” ong u Bah Powell.
Haba kylli, u Bah Powell u la ong, “Ngi ieh ïa kane ha ka jingstad jong ka seng ban rai halor u nongïalam ba thymmai hapoh ka KHADC.”
