Nongpoh, Nailur 24
Ha kawei ka jingjia tyngkhuh kali kaba shyrkhei ha ka surok bah National Highway 6 ha Nongpoh mynta ka miet, uwei u samla uba ñiah ïa ka kali ar shaka u la khlad noh hashen hadien ka jingleit tyngkhuh ïa ka bos night super hakhmat ka Civil Hospital Nongpoh.
Katkum ka khubor ba la ïoh lum, la ïathuh ba kane ka la jia ha ka por kumba 10:30 eiei hadien ba utei u nongñiah ïa ka kali ar shaka, u bym pat lah satia ban ithuh, u la ïaid bakla lyngba ka surok ka bym dei (wrong side) jongka National Highway 6 kaba la pynlong ba un leit ban tyngkhuh nakhmat jongka bos night supper kaba dang kiew sha ka nongbah Shillong na ka nongbah Guwahati.
La ïathuh ruh ba tang mar ïa tyngkhuh hapdeng katei ka bike bad ka bos, kala don ka jingkem dieng kynsan kat haduh ba utei u nongniah jong ka kali ar shaka u la ïngkhong bad bun na ki bynta jong katei ka bos ruh ka ïngkhong. Hynrei donbok ba lyngba ka jingpoi kloi jong ki pulit ka Ri Bhoi ryngkat ki pulit pynlip ding, ki nongleit nongwan ha katei ka bos ki la lait na ka jingmynsaw lait noh tang ka jing ingkhong bad duh jong ki pla bad ki tiar ki tar ki jongki. Kane ka jingjia kala wanrah ruh ïa ka jingthut ha ka leit ka wan jong ki paitbah lyngba ka surok bah National Highway 6 kiba dang kiew sha ka nongbah Shillong, ha kaba ki bor pulit kila hap ban pynïaid noh ïa ki kali lyngba ka Service Lane.
