Khliehriat, Nailur 24
Ka Jai Jai United, Sakhain Mooliment bad Krem Myrsiang ki la khur jingjop ha ka 2nd bad 1st Division Football Tournament ba la pynïaid da ka Saipung Block Sports Association (SBSA) ha ka sngi Balang ha madan Lamyrsiang.
Ha ka jingïalehkai jong ka 2nd Division, ka Jai Jai United ka la pynliem noh ïa ka Moolasngi B lyngba ka shi kol ba la thep da u Damehibudki Bareh ha ka minit kaba 63.
Ha ka jingïalehkai kaba bud, ka Sakhain Mooliment SC ka la jop da 2-1 kol ïa ka Tongseng SC. Ïa ki kol na ka Sakhain Mooliment la thep da u Dimon Pala ha ka minit kaba 12 bad u Allnes Lamare (37), katba na ka Tongseng la thep da u Rapwan Bareh (40).
Haba phai sha ka 1st Division, ka Krem Myrsiang SC ka la jop da 3-0 kol ïa ka Khaidong SC. U Nikison Chyrmang u la thep ar kol (20 & 38) bad u Kolas Phawa (45).
