New York, Nailur:
U President jong ka America, U Donald Trump ha ka Sngi Ba-ar, ula ong ba ki ri kiba na ka NATO, ki dei ban siat ia ki liengsuin jong ka Russia, kiba pynkhein ia ki jaka jong ki, kumba u la iakynduh ia U President jong ka Ukraine, U Volodymyr Zelensky, ha shilynter jong ka jingialang jong ka UN.
“Hooid nga tip”, la ong u Trump haba u nongthoh khubor u la kylli hato ki ri NATO ki dei ban siat ia ki liengsuin jong ka Russia lada ki rung ha ka jaka suin jong ki.
Kane ka jingkren jong u ka long hadien ka jingwan hiar thma dang shen da ki liengsuiñ ïapom bad ki drone jong ka Russia kiba la pynkhihwin ïa ki paralok NATO jong ka Washington ha Europe.
Ha kajuh ka por, u President jong ka US, sa shisien, u la pynphai kylla ïa ki jingkylli, hato u ngeit ne em, ba u nongïalam ka Russia, u Vladimir Putin, u long ba la pynkhreh ban wanrah noh ia ka jingiasuk, wat hapdeng ki jingkulmar jong ka Russia, kiba dang shu dep jia shen.
Utei u nongialm, uba la don 79 snem ka rta, u la ju ai por mynshwa bad bunsien, ar taiew ban shim ia ka rai, la un shim ia ki sienjam ne em, kynthup ia ki jingpynjari kyndon ba thymmai pyrshah ia ka Russia.
U Trump, uba la don ka jingïakynad ha ka prokram TV bad u Zelensky ha ka ophis treikam jong ka Oval ha u bnai Rymphang jong une u snem hapdeng ka jingiakynduh ba markhmat jongki ha katei ka por, u la bynrap ba u don ka jingburom kaba khraw ïa ka jingïakhun kaba ka Ukraine ka buh.
U Zelensky, ula ai khublei ïa U Trump, na ka bynta ka “jingpyrshang shimet jongu, ban pynsangeh ïa kane ka thma” bad ula pynsawa biang ïa ka jingkhot jong U Trump ïa ki ri Europe, ba kin sangeh ban thied ïa ka umphniang jong ka Russia.
Ka jingïakynad hapdeng ka Russia bad ka Europe halor ka Ukraine ka la nang jur shuh shuh namar ka jingpynkheiñ aiñ na suiñ dang shen.
Ka NATO ka la pynkhih ïa ki liengsuiñ jet hadien ba lai tylli ki liengsuiñ MiG-31 jong ka Russia ha ka sngi Palei ki la pynkheiñ ïa ka suiñbneng jong ka Estonia kumba 12 minit eiei, kaba la pynlong ïa ka Estonia ban khot ïa ka jingïalang jong ka UN Security Council bad ban ïakren bad ki paralok ka NATO.
Ka Poland ka para dkhot jong ka NATO ka la ong ha kaba sdang jong une u bnai ba ki drone jong ka Russia ki la pynkheiñ bunsien ïa ka jaka suiñ jong ka ha ka por ba ki hiar thma ïa ka Ukraine, ha kaei kaba ka Warsaw ka la ong ba ka long ka “jingleh donbor.”
U Trump u la ong mynshwa ba ka jingjia jong ka Poland ka lah ban dei ka jingbakla, hynrei ka jingkren kaba khatduh jong u ka pyni ia ka jingpynkhlain kaba jur ia ka kyrdan jong u.
