New Delhi, Nailur:
Ka India ha kane ka kynti, ka la ther ïa ka Pakistan, ha ka dorbar jong ka United Nations Human Rights Council (UNHRC), haba iadei bad ka jingleit ther bom jong ka Pakistan ïa la ki jong ki briew” ha Khyber Pakhtunkhwa, katba ka la pyndonkam bakla ïa ka jingïalang jong ka pyrthei ban theh ïa ki jingkynnoh “ki bym don nongrim bad kiba pynkhihwin” pyrshah ïa ka ri India. Haba kren ha ka dorbar kaba 60 jong ka dorbar hok longbriew manbriew, u nongmihkhmat jong ka ri India- u Kshitij Tyagi, u la ong ba ka Pakistan ka dei ban pynleit jingmut ha ka ban pynim ia la ka jong ka ioh- ka kot hadien katei ka jingpyniap dusmon ia ki paidbah jongka.
“Ka kynhun kaba pynpaw ïa ka jingpyrshah jong kane ka rukom treikam ka dang ïai bteng ban pyndonkam bakla ïa kane ka forum da ki jingkren khlem nongrim bad kiba pynkhihwin pyrshah ïa ka India,” ong u Tyagi uba dei u Counsellor ha Permanent Mission of India ha Geneva.
Katei ka jingsneng jong ka India, ka longr uh tang hadien shisngi ba ki shipai liengsuiñ jong ka Pakistan, ki la leit ther bom ïa la ki jong ki briew ha ka shnong Matre Dara kaba don ha Tirah Valley hapoh ka Jylla Khyber Pakhtunkhwa. Kane ka jingleit hiar thma jong ki shipai Pakistan ia ki riew paidbah, ka la shim ia ka jingim jong 30 ngut ki riew paidbah, kynthup ia ki kynthei bad ki khynnah.
Ki shipai suiñ jong ka Pakistan ki la pyndonkam ïa ki liengsuiñ ïapom J-17 ba la shna da China ban pynhap haduh 8 tylli ki bom LS-6 ba la shna da ka China, ki bom ba la pynïaid da u laser – ha kawei ka shnong ha ka por kumba 2 baje mynstep ha ka por ba ki briew ki dang thiah.
Kane ka jingshah pyniap dusmon jong ki riew paidbah, ki la wanrah ia ka jingbitar hapdeng ki nongshong shnong kiba la don lypa ha ka jingma namar ka jingkiew jong ki jingshah thombor ha kine ki snem ba la dep. Ha ka taiew ba ladep, ka la don ka jingiakhih ha Mingora, ka nongbah kaba don ha ka them Swat jong katei ka Jylla, ha kaba da ki hajar ngut, ki la ia lum lang ban dawa na ka sorkar bad ki bor pahara jongka, ba ki dei ban pynphai biang ia ka jingsuk kloi.
Ka Khyber Pakhtunkhwa ka dei ka jaka kaba jngai bad kaba don ha ki lum jong ka Pakistan kaba dap da ki jaka rieh jong ki lehnoh. Ka dei ka madan thma kaba kongsan ha kaba ka sorkar Pakistan ka pyrshang ban pynskhem ia ka jingsynshar.
