Shillong, Nailur 24
U Symbud Myntri Rangbah ka Jylla ba peit ïa ka tnad PWD (Roads), Bah Prestone Tynsong u la khmih bniah ïa ka jingïaid jong katto-katne ki projek surok kiba heh, ba kynthup ïa ka projek ‘Greenfield High-Speed Corridor’, ‘Tura by-pass’, ‘Western Bypass’, bad ka surok Shillong sha Dawki – kiba thmu ban pynbha ïa ka jingpynïasoh surok ha ka Jylla.
Haba kren sha ki lad pathai khubor hadien ka jingïalang ha ka Sngi Balang, u Bah Tynsong u la pyntip ba ka projek ‘Greenfield High-Speed Corridor’ kaba jrong 166.80 kilomitar na Mawlyngkhung, Umïam haduh Panchagram kaba don ha khappud bad ka Assam ka la ïaid shakhmat.
Ka jingtrei ‘Survey’ ha ki distrik Ri-Bhoi bad West Jaiñtia Hills ka la jan dep, bad ka kam ba ïadei bad ka jingpynbna ka dang ïaid shakhmat.
U Bah Tynsong u la pynpaw ruh ka jingshaniah ba ïa kane ka projek yn pyndep ha kaba kut jong u snem, wat hapdeng ki jingeh ha East Jaiñtia Hills namar ka jinglong-jingman ka jaka bad ka suiñ bneng.
“Nga tikna bha ba ha kaba kut jong une u snem, ngin sa lah ban pyndep wat ïa ka East Jaiñtia Hills. Ngi don shibun ki jingeh (ha ka distrik) namarba ka jaka ka long kaba jylliew bha shapoh bad ki briew ki hap ban ïaid kjat kumba ar-saw kynta, kumta ka shim por shibun (bad) namar ka aïom slap…ka NHIDCL ryngkat ki bor pynïaid distrik sa shisien kin sdang biang ïa ka kam naduh ka bynta banyngkong jong u bnai Risaw bad nga tikna bha ba kin lah ban pyndep ïa ka jingjurip bniah ïa kane ka jingpynbeit ryntih ha kaba kut jong une u snem,” u la ong.
“Shisien ba la dep ïa kata, ngi kular bad pyntikna ba ka jingpyntreikam ïa kane ka projek, kaba dei ka projek jong ka ri – 166 kilomitar kam dei kaba kai,” la ong u Bah Tynsong haba pynskhem ba ka Sorkar Pdeng ka la mang ïa ka pisa kaba heh tam kaba palat T.22,864 klur na ka bynta ki Jylla ka Thaiñ Shatei Lam Mihngi.
U Symbud Myntri Rangbah u la pynbna ruh ba ka projek ‘Tura by-pass’ ka la jan dep, ha kaba ka bynta ba khatduh ban pynmih ïa ka jingpynbna ‘3G’ ka dang ïaid shakhmat.
“Ngi la poi ha ka kyrdan ban pynithuh ïa ki trai jaka ban siew ïa ka bai lut ksan jaka. Baroh ki kam ki ïaid beit bad nga tikna ba hapoh une u snem, ngin sa lah ban siew ïa ka bai lut ksan jaka na ka bynta ka ‘Tura by-pass’,” u la ong.
Haba pynpaw ba ki song I, II, IV bad V jong ka projek surok Shillong-Dawki ki ïaid shakhmat, u Bah Tynsong u la ong ba u la bthah ïa ka kompeni shna surok ban pyndep noh ïa kane ka projek ‘4-lane’ hapoh u bnai Nohprah mynta u snem. Ïa ki song II, IV, bad V la khmih lynti ban pyndep ha u bnai Nohprah, 2026.
“Ki (heh jong ka kompeni) ki la pyntikna ïa ngi ba kin lah ban pyndep ïa ka projek ‘4-lane’ hapoh u bnai Nohprah, mynta u snem,” u la ong da kaba bynrap “Nga sngewskhem bha ba wat ïa ka song ba II ruh yn sa lah ban pyndep hapoh ka tarik ba la buh, kaba ki la buh ha u bnai Nohprah, 2026. Kumjuh ka long haba ïadei bad ka song ba IV bad V, nga sngewskhem ba ngin sa lah ban pyndep hapoh ka tarik ba la buh da ka NHIDCL bad ka kompeni ba pyntrei.”
Shuh-shuh u la pyntip ba ka ‘Pynursla by-pass’ ka dang ap ïa ka jingpynbna jong ka ‘3G’ ban pyndep ïa ka jingsiew bai lutksan haba ïadei bad ka jaka.
“Shisien ba la aiti ïa ka jaka sha ka NHIDCL, la lah ban sdang ïa ka kam,” u la ong.
Halor ka jinglong-jingman jong ka projek ‘Western Bypass’, u Bah Tynsong u la ong ba ka jingïaid ki kam ka long kaba i-hun, watla ki don katto-katne ki jingeh kiba ïadei bad ka jingkam jaka kiba donkam ban pynbeit.
U Bah Tynsong u la bthah ïa ki Deputy Commissioner ka Ri-Bhoi bad ka East Khasi Hills ba kin pynbeit noh kloi katba lah ïa kane ka jingeh.
“Nga tikna bha ba ïa kane ka projek yn sa lah ban pyndep ha u snem ban wan,” u la ong.
