Jowai, Nailur 24
Ka Lumbhahdakha Wahïajer bad ka Shangpung Khlieh-muchut ki la khur jingjop ha ka 2nd Division Football Tournament (8th Debo Shullai Memorial Trophy) ba la pynïaid da ka West Jaiñtia District Sports Association (WJDSA) ha ka sngi Balang ha Kiang Nangbah Stadium, Jowai.
Ha ka jingïakhun kaba nyngkong, ka Lumbhahda-kha Wahïajer ka la pynjem khnap ïa ka Umlangchor Mukhla da 7-2 kol. U Balajied Shylla u la thep ar kol ha ka minit kaba 22 & 25, katba ïa kiwei pat la pynbud da u Agustin Mukhim (16), Kamjuh Phawa (40+1), Frankin cense Shylla (52), Bernard Suchiang (75) bad u Gideon Mukhim (77). Na ka liang ka Umlangchor Mukhla ka la pynphai kylla lyngba ka jingïarap pynthep da u rangïalehkai ka liang pyrshah u Jessper Shadap (46) bad kawei pat da u Request Shylla (53).
Haba phai sha kawei pat ka jingïalehkai kaba bud, ka Shangpung Khliehmuchut ka la jop da 3-2 kol ïa ka Mupliang SC.
Ha kane ka jingïakhun ka Mupliang ka la thep kol nyngkong ha ka minit 2 lyngba u Greatfull Sna bad kawei pat da u Jeson Phawa (15). Hynrei ka Shangpung Khliehmuchut ka la lah ban pynphai kylla haduh lai kol lyngba u Banshanbor Lamare (19), Shickil Langbang (36) bad u Teilang Langstamg (46) na ka bynta ban khur ïa ka jingjop.
