Shillong, Nailur 24
Ka Jylla ka la khur biang sa saw tylli ki takma rnong ha ka sngi kaba khatduh jong ka lympung ïalehkai 36th East Zone Junior Athletics Championship 2025 kaba la poi sha kaba kut mynta ka sngi ha Ranchi, Jharkhand.
Ïa kine ki takma la khur da ka Balasiewdor Pathaw, Anrisha Klein, Damika R. Lyngdoh lem bad u Semion Marak.
Ha kane ka jingïalehkai kaba la long ha ka sngi Balang, ka Balasiewdor ka la khur ïa ka takma rnong ha ka jingïakop mareh kaba 3000 mitar jong kiba hapoh 20 snem ka rta da kaba ka la lah ban pyndep ha ki 1:24:62 sekhon.
Kumjuh ïa ka takma rnong la khur da ka Damika ha ka jingïakop mareh kaba 200 mitar jong kiba hapoh 20 snem hadien ba ka la pyndep ha ki 26:45 sekhon.
Ha ka High Jump jong kiba hapoh 20 snem ki shynrang, u Semion Marak u la khur ïa ka takma rnong hadien ba u la lah ban kynthih ha ka 1.80 mitar. Katba ha ka liang ki kynthei, ka Anrisha ka la khur ïa katei ka takma ha ka High Jump da kaba ka la lah ban kynthih ha ka 1.51 mitar.
Haduh kane ka sngi kaba khatduh, ka Meghalaya ka la khur 11 tylli ki takma kiba kynthup ïa san tylli ki takma rupa bad hynriew tylli ki takma rnong.
