Shillong, Nailur 24
Ka East Khasi Hills District ka la long ka lahduh ha ka 22nd Meghalaya Wushu Championship 2025, kaba la poi sha kaba kut ha ka 20 tarik mynta u bnai.
Ïa kane ka lympung ïalehkai kaba la sdang ha ka 19 tarik, la pynïaid da ka Meghalaya Wushu Association (MWA) hapoh ka jingkhmih jong ka Wushu Association of India (WAI), ha kaba la wan shim bynta da kumba 400 ngut ki nongïalehkai wushu kiba na ki khyndai tylli ki district kata ka East Khasi Hills, West Khasi Hills, East Jaiñtia Hills, West Jaiñtia Hills, Eastern West Khasi Hills, Ri-Bhoi , West Garo Hills , South Garo Hills bad South West Khasi Hills.
Ïa ka lympung la wan ban plie da u MDC na Mawkynrew Constituency u Bah Seibor Warbah bad la wan pynhap pyrda da u Working President ka Meghalaya State Olympic Association (MSOA) u Bah John F Kharshïing. Ïa ka kyrdan ba-ar la ïoh da ka West Jaiñtia Hills District bad ïa ka kyrdan balai la ïoh da ka Ri Bhoi District.
Ka jingpynlong ka MWA ïa katei ka lympung ka long ban jied ïa ki nongïalehkai Wushu ba kin ïoh ka jingshah hikai ha ka wat kaba nyngkong ka ban neh shi bnai kynthih ka ban sdang naduh mynta u bnai Nailur haduh u Risaw ha MSMA Training Centre na ka bynta ban pynkhreh ïa ka kynhun ki nongïalehkai Wushu ha ka Sanda bad Toalu na ka bynta ka 39th National Games Team ka ban long ha u snem 2027 ha ka Jylla Meghalaya.
