Nongstoiñ, Nailur 24
Ki bahaïing hasem jong ka Samla Iwanpynkmen Nongsiej, 14 snem ka rta na ka shnong Ksehkohlong ha West Khasi Hills, kaba la duh noh ïa la ka jong ka jingim na ka jingphasi, ki la ong ba kim shym la don ka jingkynnoh ne suba ïano-ïano hynrei katkum ka jinglap bad ka jingshem ka jong ki, ka dei ba ka la leh hi.
Ïa kane la pynpaw ruh da u Bah Sholestar Nongsiej, uba dei u kñi jong katei ka samla haba kren bad ki nongthoh khubor ha ka sngi Balang ha kaba u la ong, kala leh hi da kaba sdien phasi ha uwei u dieng kseh marjan bad ka ïing ka jong ka, kaba jngai tang kumba 400 meter eiei na ka ïing.
Shuh-shuh u la ong ruh ba kum ki bahaïing hasem halor ka jingïoh sngew ïa ki khubor hamsaia ban kynnoh khamtam ïa ka shnong ha kaba kiba bun ki kynnoh ba leh sniew, ne menshohnoh hynrei ki bahaïing ki la kyntait mardor ïa kata.
U la ïathuh ruh ba kane ka khynnah la ar sien kala jah na la ïing na ka jingshah mai ha ka kmie na ka jingleh jong ka bad kala leit phet sha lum ha kaba kumba shimiet shi sngi kala shu sah ha lum bad hadien haba la lap la wan ïalam biang sha ïing, ha kaba ki bahaïing hasem ki la sneng la kyntu ïa ka.
Shuh-shuh u la pynpaw ruh da kaba ong, “Kane ka jingjia kaba mynta ruh ha shuwa ba kan mih na ïing, na ka liang jong ngi ngim shym la poi pyrkhat ba kan sa jia noh kumne namar ngi dang pyrkhat ba namar ka bun ki paralok kiba na jngai lehse ka leit sah bad ki paralok namar ka dei ka sngi shuti namar ba ngi peit thuh khamtam ïa ki jaiñ ki nep ba ka rah na ïing bad ka sum ka sleh imat ka leit jingleit, hynrei ngim lah mutdur bad ngim shym la poi pyrkhat ba kan sa jia bad kan long kumne”.
Lah ban kdew hangne ba katei ka samla ka la mih na la ïing ha ka janmiet jong ka 20 tarik u Nailur, 2025 hynrei naduh katei ka janmiet kan shym la wan phai ïing shuh, ha kaba watla ki bahaïing hasem naduh katei ka sngi ki la pyrshang ban wad hynrei ym shym la lap satia, hynrei dei tad ha ka 23 tarik mynta u bnai, ki katto katne ki briew kiba dang leit kheit tit ki la lap pynban ïa ka met jong katei ka samla ba la phasi.
Shuh-shuh kumba long ha ka sngi Balang jong ka taïew hadien ba la pyndep ïa ka post-mortem ha Civil Hospital Nongstoiñ, ïa ka met jong katei ka samla la pynkit noh sha shnong Ksehkohlong, ha kaba la pyndep ruh ïa ka jingleit ontep ha u lum jingtep ka Balang Presbyterian Ksehkohlong.
