Shillong, Nailur 24
U Symbud Myntri Rangbah ka Jylla u Bah Prestone Tynsong uba long ruh u State President jong ka National People’s Party (NPP) haba kyntait ïa ka jingdawa ba dang shen na ka bynta ban thung bujli Myntri Rangbah da u Khasi, u la ong ba ka jingpynleit jingmut ka dei ban long ïa ka roi ka par bad ka bha ka miat jong ka Jylla ha ka jaka ban jied jaidbynriew.
“Ngam don eiei ban kynthoh halor kane namar balei ngin ïa wanrah ïa ka jingsngewpher jaidbynriew. Nga sngew ba ngim dei ban ïakren satia halor kane,” la ong u Bah Prestone haba kren sha ki lad pathai khubor haba jubab halor ka jingdawa jong kawei ka sengbhalang.
U Bah Prestone u la ban ba kaei kaba kham kongsan ka long ban pynthikna ïa ka roi ka par jong ka Jylla bad ruh ba ka bha ka miat ka dei ban don ha ka lynti kaba dei.
“Katba ngi dang don ha Meghalaya, bad kum ki MLA ka Meghalaya, ngam don satia kano-kano ka jingsngew mano ba dei u Myntri Rangbah,” u la ong haba ai ruh ïa ka khubor kaba shai ba um kwah satia ban long u Myntri Rangbah.
Shuh-shuh u Bah Prestone u la ong, “Ai ba ki nongshong shnong jong ngi kin sngewthuh ïa kane. Lada phi ong hooid phi wanrah ïa u Myntri Rangbah lehse na West Bengal lane na Bangladesh ne Assam, nga ruh ngan pyrshah jur ïa kane.”
