Jowai, Nailur 24
Ka Mukhla Raij ka la jam sha ka final ha ka lympung ïalehkai Super Division Football Tournament na ka bynta ka Kelsiroy Pala Memorial ba la pynïaid da ka Thadlaskeiñ Sports Association (TSA).
Kane ka la wan hadien ba ka la lah ban pynliem noh ïa ka Lumphyrnai Sohphoh da 4-2 kol ha ka semi final kaba nyngkong kaba la long ha ka sngi Balang ha Wahïajer Multi Sports Complex.
Ha kane ka jingïakhun ka Mukhla Raij ka la thep mar ar kol ha ka kylla step bad kylla miet. Ïa kine la thep ar kol da u Chandame Suna ha ka minit kaba 16 & 47, kumjuh u Welcome Sari (38), bad u Meker Pyrtuh (71). Hynrei ka Lumphyrnai Sohphoh ka la pynphai kylla ar kol lyngba u Dapyntgen Suting (74) bad u Sumar Suting (90+ 4) hashwa ba kan mad ïa ka jingshah rem.
Ha ka sngi Palei ka jingïalehkai quarter final jong ka 2nd Division kan long hapdeng ka Ïawpynsin Wahïajer pyrshah ïa ka Thadmusem ha ka por 1 baje mynsngi, katba ka Maïa Club Umjlasiaw bad ka Madur ha ka por 3 baje nohphai sngi.
