Shillong, Nailur 24
U Chairman ka Khasi Hills Autonomous District Council (KHADC) Bah Strong Pillar Kharjana u la dep ban phah ïa ka shithi iehnohkam jong u Chief Executive Member (CEM) Bah Shemborlang Rynjah sha u Lat ka jylla u CH Vijayashankar ha ka janmiet jong ka sngi Balang.
Haba pynthikna, la ïoh ban ïakren lyngba ka phone bad u Bah Strong uba la ïathuh ba hadien ba la ïoh ïa ka shithi iehnohkam na u CEM, Bah Shemborlang Rynjah, ma u ruh u la phah noh ïa ka shithi sha u Lat ka Jylla.
Kum ban shu kdew, kane ka jingpyntip u Chairman ïa ka shithi iehnohkam jong u Bah Shemborlang sha u Lat ka long ban pynsted ban pynlong ïa ka ilekshon jied ïa u CEM ba thymmai ka KHADC hadien ba ka shuki ka la thylli.
Kum ban shu pynkynmaw u Bah Shemborlang u la shimti ïa ka shuki CEM ha ka 28 tarik Rymphang, 2025 hadien ba ki paidbah ki la jied marwei ïa ka VPP ha ka ilekshon MDC sha KHADC haduh ban thaw marwei ïa ka Executive Committee.
