Shillong, Nailur 24
Ka Malki SC ka la khur ïa ka jingjop ha ka lympung ïalehkai Shillong Premier League 2025, hadien ba ka la lah ban pynliem noh ïa ka Nongrim Hills da 1-0 kol ha ka sngi Balang ha SSA Stadium kaba ha First Ground, Polo.
Ïa kane ka shi kol ba kordor tam jong ka Malki la thep da u Ribanshan Marpna ha ka minit kaba 68, kaba la biang pura ïa ka ba kan lait na u line saw (relegation zone), kaba dei artad ka jingïakhun kaba khatduh jong ka kylla kaba san (Round-5).
Kumban shu pynkynmaw ba kane ka dei kaba la bteng na kaba la pynïalehkai teng myn ha ka 12 tarik mynta u bnai, ïa kaba la hap ban pynsangeh noh hadien ba u lapbah uba jur u la wan ban ther kynsan bad ban pyndap smam da ka um ïa ka madan ïalehkai jong ka First Ground.
Ha baroh shi bynta jong kane ka jingïakhun hapdeng kine ki ar kynhun mynta ka sngi la shem bad ïohi ba ki rangïalehkai shakhmat ki la shem shitom bha ban lah ban pynkhih ïa ka jar, kampher wat hadien ba la mih paw kiba bun ki kabu ksiar, pynban ha kaba kut u Ribanshan, u la kham trei shitom nalade khyndiat bad nabar jong ka ‘box’, u la khyrwit da kaba tyngeh ïa ka bol bad ka la rung hi jlang ha kaba u rangapkol ka Nongrim Hills u Ebenson Warbah um shym la lah ban khanglad.
Hadien ba la dep ban shah tam shakhmat ïa kane ka shi kol, ki rangïalehkai ka Nongrim Hills, ki la pyrshang katba lah ban wanphai biang sha ka lynti ka jingïakhun, ïa kaba kim shym la lah pat ban pynurlong bad ha kaba kut, kin hap ba kin pdiang ïa kane ka jingshah rem kaba dei artad kaba saw ïa ki ha kane ka samoi ïalehkai na ki san sien ïalehkai kiba ka la dep, ha kaba ka shi point ba ka Nongrim ka la lah ban ïoh khur ka la wan lyngba ka jingïakhaid kaba long da mar ar kol pyrshah ïa ka Laitkor SC.
Da kane ka jingjop, ka Malki ka la khur 6 point ryngkat lang bad ka Sawmer SC tangba ka jingïapher hadpeng kine ki ar kynhun ka long ha ka jingthep kol (-10 & -11).
Ka jingïalehkai ha ka sngi Palei kan long hapdeng ka Laitkor SC pyrshah ïa ka Rangdajied United FC ha ka por 3:30 janmiet.
