Shillong, Nailur 25
Ka Meghalaya AIDS Control Society ha ryngkat ka jingïatreilang bad ka tnad ka Koit ka Khiah ka la pynlong ka jingai jinghikai bad jingsumar ei ïa ki paidbah ha Mawryngkneng Community Health Centre.
U Bah Heavingstone Kharpran, MLA ka Mawryngkneng Constituency haba ai jingkren kum u kongsan u la ong, ka koit ka khiah ka dei kaba donkam tam ha ka imlang ka sahlang, haba koit ba khiah ki paidbah ka shnong ka thaw ka kiew bad ki khun ki kti ki lah ban pule bha bad pynleit jingmut ha ki jingpule jong ki, ki samla ki lah ban ai ka jingïatreilang ha ryngkat ki riew rangbah bad ki im ki san ha ryngkat ka burom ka akor ba ki ïoh.
U MLA ka thaiñ u la buh ka jingkyntu ïa ki khun samla ka thaiñ ba kin long kiba adkar ba kin lait na kiba bun ki jingpynshoi, namar ki bun bha ki khun samla kiba ngop ha ki kam awria bad bun ki khun samla ki ba hap ha ka apot jong ka jingpang HIV.
“Ka long kaba donkam ban sumar ïa la ka jong ka met ban lait na ki jingpang kiba sniew, haduh mynta ym pat lap ïa u dawai ba lah ban pynjem ïa ka jingpang HIV, namar kata ka long kaba donkam ban sumar ïa la ka jong ka met”, la ong u Bah Kharpran.
U la buh ka jingkyrpad ïa ki doktor, ki nongtrei ba hapoh ka CHC ba kin long ki ba pdiang sngewbha ïa ki nongwan shim dawai hapoh ka CHC, kumjuh ruh ki paidbah haba pang ba shitom ki dei ban wan ban shim ka jingsumar ha kane ka jaka ai jingsumar, ha kaba kim donkam shuh ban leit shaduh sha nongbah Shillong.
U Bah Kharpran u la ong ba ha Mawryngkneng CHC la donkam khambun ki Doktor ba shemphang ha kaba u la ïakren bad ka Myntri ka koit ka khiah ban buh doktor khambun, hynrei kane kam shym pat urlong haduh ba la kylliang Myntri noh da uwei. U la ong ba haba ïadei bad kane ka bynta un sa shimkhia ban leit ïakren bad u Myntri ba thymmai ba khmih ïa ka tnad ka koit ka khiah ban pynurlong ïa kane ka jingdonkam hapoh ka Mawryngkneng CHC.
Shuh-shuh u la ong, lyngba kine ki jingai jinghikai bad ai jingsumar ei ki paidbah kin ïoh jingmyntoi, la ka dei ha ka jingai jingsumar, ka jingpeitbniah haba ïadei ka jingpang HIV bad AIDS, “kane ym dei ba pynsepei ïa ka por hynrei ka long ka jingai jingtip ïa ki paidbah ba donkam ban sngewthuh ban ïada ïalade.”
