Shillong, Nailur 25
Ka Voice of the People Party (VPP) ha ka sngi Palei ka la jied ïa u MDC ka Nongthymmai, Bah Tony Winston Lyngdoh, kum u Nong-ïalam ka Parliamentary Party ha Khasi Hills Autonomous District Council (KHADC), u ban sa shimti ïa ka shuki kum u Chief Executive Member (CEM) ba thymmai ka Council.
Ïa kane ka rai la shim ha ka jingïalang kyrkieh ba la pynïaid da u President ka VPP u Bah Ardent M Basaiawmoit, ha kaba la wan ïashim bynta da baroh ki MDC.
“Hadien ka jingshim rai jong u MDC ka Langkyrdem-Laitkroh Bah Shemborlang Rynjah ban hiar noh na ka shuki CEM namar ka jingbym don ha ka met ba koit ba khiah, ka VPP ka la jied ïa u Bah Winston Tony Lyngdoh, MDC na Nongthymmai ban shimti kum u CEM ba thymmai,” la ong u Bah Ardent sha ki lad pathai khubor hadien ka jingïalang.
U Bah Ardent u la pynbna ruh ba u MDC ka Jaiaw u Bah Denzil Raynard Chen un shah pynrung kum u Executive Member (EM) ba thymmai. Kane ka jingpynbna ka la long hadien ka jinglait thylli noh jong kawei ka shuki EM, da ka jingkiew kyrdan noh jong u Bah Winston sha ka kam CEM.
U Bah Ardent u la batai ba ka seng ka la rai ban nym thung Deputy CEM, namar ba kane kan nym wanrah ïa ka jingïaid beit ne ban pynneh ïa ka EC hapoh ka Council.
Ha kaba ïadei pat bad ki tnat ki ban sa sam bhah, u Bah Ardent u la ong ba ka seng ka ieh ha ka jingstad jong u CEM ba thymmai.
U President ka VPP u la pynpaw ruh ïa ka jingsngewhun halor ka rukom treikam jong ka EC, kaba la wanrah ïa ka rukom treikam kaba janai jong ka KHADC bad ruh ban wanrah ïa ka synshar kaba khuid.
