New York, Nailur:
U Secretary kam bar ri jong ka US, u Marco Rubio, u la ioh ban ïakynduh bad u Myntri kam bar ri jong ka Russia, u Sergey Lavrov, ha shilynter jong ka High-Level Week jong ka dorbar ba 80 jong ka United Nations General Assembly (UNGA).
Ka General Debate kaba man la u snem jong ka UNGA ka dang ïaid mynta, ha kaba ha ka sngi kaba ar kin don ki nongïalam ba pawkhmat jong ka pyrthei ban ai jingkren ha kane ka jingïalang.
Ha ka thup jong ki nongkren ha ka sngi thohdieng, ki kynthup ïa u President ka Ukraine, u Volodymyr Zelenskyy, u Masoud Pezeshkian jong ka Iran, u Javier Milei jong ka Argentina bad u nongïalam ba shipor jong ka Syria, u Ahmed al-Sharaa.
Kaba kham pawnam ka long ba ka jingkren jong u Al-Sharaa ka dei ka sien kaba nyngkong ha kine ki jan hynriew phew snem ba u nongïalam jong ka Syria u la ai jingkren ha ka dorbar bah.
Ha ka jingkren jong u, u President Zelenskyy u la pynpaw ïa ka jingshisha kaba sngewsih ba bun ki jaitbynriew kiba la mihkhmat ha ka hall ki don ha ka thma ne ki dang shu mih na ka thma, ne ki pyrshang ban khanglad ïa kawei ne ki pynkhreh paw na ka bynta kawei.” U la ong ba ka shong ha kito kiba ha shuwa jong u ban rai la yn pynkut noh ne em ia ka jingleh donbor jong ka Russia ha Ukraine.
U la ban jur ruh ba katba ka G7 bad G20 ki don ïa ki bynta kiba kongsan, hynrei ha kaba kut ka jingkitkhlieh ka shong ha baroh ki dkhot jong ka UN.
U Zelenskyy u la pynpaw ruh ïa ka jingsngewsih kaba paw halor ka rukom treikam jong ka UN Security Council, ha kaba ka Russia ka bat ïa ka jinglong dkhot ba neh bad ka bor veto.
“Ka aiñ pyrthei kam shym la treikam pura, lymda phi don ki paralok kiba donbor kiba kloi shisha ban ieng na ka bynta jongka,” u la bynrap.
Ka Russia ka la pyndonkam bunsien ïa ka bor jongka ban khanglad ïa ki rai kiba ïadei bad ka jingïakynad ha Ukraine bad ka jingeh jong ki briew ha Sudan. Ha ka histori, ka Moscow bad ka Soviet Union kaba la wan ha shuwa jong ka, ka la pyndonkam da ka veto kham bunsien ban ïa kiwei pat ki dkhot ba pura jong ka UN.
