Nongstoiñ, Nailur 25
Ha ka sngi Palei ka ophis jong ka District Medical & Health Officer (DMHO) ka West Khasi Hills District ryngkat ka jingïatreilang bad ka District Animal Husbandry & Veterinary Department ka la pynlong ïa ka “Rabies Awareness Programme” ha St. Peter’s Higher Secondary School, Pyndengrei.
Ha katei ka sngi la sdang ïa ka prokram da ka jingïashim bynta jong ki khynnah skul na kylleng ka district ha ki jingïakop thoh dur (drawing), Poster bad Elocution naduh ka por 10 baje mynstep haduh 1 baje mynsngi bad ka phang pdeng jong baroh kine ki jingïakop ki long halor ka mat kaba ïadei bad ki jingtip jong ki samla shaphang ka jingpang Rabies kaba shyrkhei bad ban pynphriang ïa ka jingïohi bad jingsngewthuh kaba shai halor ka jingma jong ka jingpang rabies.
U Bah CP Mawkon, Additional Deputy Commissioner ka West Khasi Hills District haba kren kum u kongsan u la ong, ka jingshah dait mrad la ka dei ha ki ksew, miaw, bad kiwei-kiwei ki mrad ym dei satia ban kheiñ sting namar kham bunsien kane ka jingpang lada ym sumar ka lam beit sha ka jingïap hynrei lah ban ïada ïa ka.
“Ka jingïada kham kloi bad ka tika, ka lah ban pynim ïa ka jingim,” ong u Bah CP Mawkon bad u la kyntu ruh ïa ki khynnah skul ba kin pynsaphriang ïa ka jingtip kaba ki ïoh na kane ka prokram sha ki longïing longsem bad sha ka imlang sahlang.
Shuh-shuh ha kane ka sngi u kongsan u la plie paidbah ruh ïa ka video jingtip lyngba ka Youtube kaba ai jingtip halor ka rabies.
La ong ruh ba naduh u snem 2024 haduh mynta, ka district ka la shem ba don palat 6 ngut kiba la ïap na ka daw jong ka jingpang rabies, kaba pynpaw ba dang donkam shuh-shuh ban bteng ïa ka jingpynshai paidbah bad ka jingpyrkhat halor ka koit ka khiah paidbah.
Ha kane ka sngi ki nongkren ki kynthup ruh ïa u Dr. R Marwein, District Nodal Officer, NRCP, uba la ai ïa ka jingkren shaphang kane ka jingpang, ka DR. L Mylliemumlong ophisar na ka District Animal Husbandry & Veterinary kaba la kren bniah halor ka jingpang rabies, kaba la kdew ba ka rabies ka long ka jingpang kaba lah ban ïada, hynrei kam don dawai satia ïa kane ka jingpang lada ka la paw ki dak, kumta ka jingtip bad ka tika ha ka por kaba biang ka long kaba donkam eh.
La pynkut ïa ka prokram da ka jingai khusnam sha ki nongjop ha ki jingïakop thoh dur (Drawing Competition) – St. Francis D Assistant Higher Secondary School, Poster Competition – Sibsingh Memorial Higher Secondary School, Elocution – St. Peter’s Higher Secondary School.
