Shillong, Nailur 25
Kum shibynta jong ka jingrakhe ïa ka Jubili Ksiar, ka Synod Kolej ha ka 25 tarik u Nailur 2025, ka la pynlong ïa ka Science Exhibition, ha kaba 45 tylli ki skul bad ki kolej ki la wan ban ïa shim bynta na kylleng jong ka East Khasi Hills bad na kiwei de ki district kiba marjan.
Ha kane ka sngi, ki skul bad ki kolej ki la pyni ïa shibun ki jinglap ba thymmai kaba ki lap ha ki phang bapher-bapher kiba la buh ha ki.
U Myntri ba khmih ïa ka tnad pule puthi ka Sorkar Jylla u Bah Lahkmen Rymbui uba long kum u kongsan ha kane ka sngi u la ong ha ki khynnah skul bad ki samla pule ba ka shong ha ki, kumno kin ïoh ïa ki jingmut kiba thymmai ban ïohi bad ban jied da lade kaei kaba bha tam.
U Bah Rymbui u la ong, “Ai ba ka jabieng jong phi kan jied ba kan neh haba ïadei bad ka jingkiew ha ki kor ki bor jong kane ka juk ba mynta, na ka bynta ka jingmyntoi jong phi bad jong ka lawei ban wan”.
Shuh-shuh u Bah Rymbui u la ong ba hapoh ka jingïalam jong u Myntri Rangbah ka Jylla u Conrad K Sangma, ki don ka jingthmu ban ailad ba kin shim ïa ka kabu ban pyntbit ïalade. Da kaba ong “Ngi tip ba ka don ka jingïapher, ym tang ha ka pule-puthi hynrei ha ka jingtbit ha ki kor ki bor ruh kumjuh.”
“Nga kmen ba ha kine ki 7 snem, u Myntri Rangbah u la pyrshang ban peit ha baroh ki liang, la ka dei ha ka pule-puthi, ha ka koit ka khiah bad ha kiwei-kiwei ki bynta ruh kumjuh. Ai ba kane ka ‘exhibition’ kaba phi pynlong mynta kan long ka jinghikai ïa phi,” la ong u Bah Rymbui.
Ha kane ka sngi, na ka liang u Myntri u la leit jngoh ruh ïa ki jingpyni jong ki khynnah skul bad kolej bad twad jingmut ruh na ki halor ka jingmut jong ki jingpyninam kiba ki la pyni.
