Shillong, Nailur 25
Ka Voice of the People Party (VPP) kaba don ha ka Liang Pyrshah ka la pynpaw biang ïa ka jingpyrshah kaba jur ïa ka rai jong ka Sorkar Jylla ban siew tulop ïa ki nongtrei jong ki lai tylli ki Autonomous District Council (ADC) ha ka Jylla.
Haba ïakren bad ki lad pathai khubor ha ka sngi Palei, u President ka VPP uba dei ruh u MLA ka Nongkrem, u Bah Ardent M Basaiawmoit u la ong, “Ngi la pyrshah ruh ïa kane ka jingthmu ka Sorkar ha ka dorbar tlang jong ka ïingdorbar kaba dang shu kut shen (namar kan pynduhjait ïa ka jingsynshar shimet jong ki ADC).”
Ha ka jaka ban siew tulop beit, u Bah Ardent u la ai jingmut ba ka Sorkar ka dei ban pynheh ïa ka mang tyngka na ka bynta ki ADC, ban ai jingïarap pisa ba shisien, bad ban pynthikna ban pyllait ïa ki bhah jong ki council ha ka por kaba biang.
U la kdew ïa ka jingkular ba la ai da u Symbud Myntri Rangbah hapoh ka ïingdorbar bad u la kyntu ïa ka Sorkar ba kan pyndep ïa ka.
Katba ka Garo Hills Autonomous District Council (GHADC) bad ka Jaiñtia Hills Autonomous District Council (JHADC) ki lah ban mad ïa ka jingeh ha ka liang ka pisa tyngka, u Bah Ardent u la ong ba ka Khasi Hills Autonomous District Council (KHADC) ka don ha ka kyrdan kaba kham bha namar ka jingpynmih khajna kaba kham biang.
“Ngi ïohi ba kan ym don jingeh ha KHADC, lada ym don ka jingpynthut na ka Sorkar. Ka KHADC ka la sakhi ïa ka jingkiew ha ka jingpynmih khajna jong ka,” u la ong.
Utei u nongïalam ka VPP u la ban jur ruh ba ki ADC ha Meghalaya ki long kiba kyrpang bad ki don ka jingïadei kaba kyrpang bad ka Sorkar Jylla katkum ka Sixth Schedule jong ka Riti Synshar ka Ri.
U la ban jur ba watla ki don ki pud bad ki jaka ba lah ban don ka jingïatyngkhuh, hynrei ki ADC kim dei ban ïeng pyrshah ïa ka Sorkar Jylla hynrei ki dei ban shakri ïa ki paidbah.
Ha ka jingïohi jong u, ki jingeh ki lah ban mih na ka daw jong ka politik, hynrei dei ban burom ïa ka jinglong ‘Autonomous’ jong ki ADC.
U la pynpaw ka jingsngew skhem ba kan nym don kano-kano ka jingïatyngkhuh hapdeng ki ADC bad ka Sorkar Jylla, namar ka jingthmu jong ki ka long ban shakri ïa u paidbah, ym ban pyrshah ïa ka Sorkar.
