Imphal, Nailur:
Ki pulit ka Manipur ki la pynlong ïa ka jingkhynra kaba ïatreilang ha kylleng ki lai tylli ki distrik ha ka 24 tarik u Nailur, kaba la pynlong ban ïohkem ïa lai ngut ki briew kiba don jingïadei bad ki kynhun lehnoh ba la khang pyrshah bad kurup ïa ki tiar siat bad ki tiar pynbthei.
Kane ka jingïohkem ïa kine ki lehnoh ka dei kaba ïadei bad u Kangjam Rakesh Singh uba la 48 snem ka rta u nongkhaïi tuh ïa ki tiar na Brahmapur Bamon Leikai ha Imphal East. Ki bor pahara ki la kem ïa u Singh ha Moirangkhom Old Thumbuthong Makhong bad ki la ïoh kurup ïa kawei ka suloi 9mm kaba la thep bad ki kuli bym pat pyndonkam, ha kaba kane ka pynpaw shai ïa ka jingdon jong ka kynhun khaïi tiar kaba treikam ha kane ka thaiñ.
La kem ruh ïa arngut ki lehnoh kiba dei ki dkhot ha ka por ba la pynlong ïa ka jingkhynra. Ïa kine kiba la shahkem la tip kyrteng kum u Naorem Abinash Singh, 19 snem ka rta, ïa uba la shah ithuh kum u dkhot jong ka kynhun PREPAK, une u la shahkem hajan ka BT Park ha Imphal West distrik. Ki pulit ki la lap ba dang shen u la dawa pisa T.5 hajar na uwei u nongshong shnong ha ka thaiñ Kakching.
Katba u Salam Kipjen Singh, 45 snem ka rta, u dei u dkhot jong ka RPF/PLA, u la shah kem ha ki thaiñ Tronglaobi jong ka Bishnupur distrik ryngkat bad ka thuk thuk bad ki tiar pyntip khubor jong u.
