Caracas, Nailur:
Ka tnat Geological Survey jong ka US, ka la iathuh ba u jumai uba 6.2 ka jingkhlaiñ u la pynkhynñiuh ia ka thaiñ Shatei Lam Mihngi jong ka Venezuela ha ka Sngi Balang.
Ka tnat treikam ka la ïathuh ba ka jaka ba utei u jumai u kham jur ka jingkhynñiuh, ka long kumba 15 mile (24 Kilometre) na ka phang Mihngi-Shatei Lam Mihngi jong ka shnong Mene Grande ha ka jylla Zulia, kumba 370 Mile (600 Kilometre) ka jing jngai na ka phang Sepngi jong ka nongbah Caracas.
Ka sorkar Venezuela, kam shym la ai jingtip mardor, halor katei ka jingkhynñiuh utei u jumai, ha kaba ka tnat Geological Survey jong ka U.S. pat ka iathuh ba ka jingjylliew jong utei u jumai ka la kot ia ka 5 Mile lane kumba 7.8 Kilometre.
La ong ba ki paidbah nongshong shnong, ki la iohsngew ia katei ka jingkhynñiuh jumai ha ki katto- katne tylli ki nongbah bad kumjuh ruh ha ka nongbah Colombia kaba marjan. Bun ki la pynkynriah ia ki iing sah bad ki iing ophis ha ki jaka ba marjan khappud. Hynrei, ym shym la ioh jingtip ban don don kano kano ka jingjulor ha kano kano ka bynta jong katei ka ri.
Ka Mene Grande ka don ha ki bynta rud duriaw jong ka phang Mihngi jong ka Maracaibo, ka jaka kaba kongsan naka bynta ka karkhana dewbilat jong ka ri. Ka Venezuela ka dei ka nongbah kaba lah ban pynmih bun eh ka umphniang ha ka pyrthei.
