Shillong, Nailur 25
Kum ka dak jong ka jingkyrshan bad ban ai mynsiem ïa ki nonghikai, na ka liang jong ka Jaiñtia Students Union (JSU) Shillong Circle ha ka jingïalam jong u Adviser Bah Aiban Suchiang ki la leit ïakynduh ïa ki nonghikai ad-hoc kiba shong ‘sit in protest’ ha madan Malki, Shillong ha ka lama jong ka Federation of All School Teachers of Meghalaya (FASTOM).
Ha kane ka jingkynduh, ki nongïalam jong ka FASTOM ki la ïathuh bad pynsngew ïa ki mat ki jingdawa ki jong ki, kaba ki dei hok ban ïoh ba la sahteng slem. Ka jingdawa jong ki ka long ban pynkiew kyrdan ïa ki na ka adhoc system sha ka deficit system.
“Hadien ba la ïohsngew ïa ki jingeh ki jong ki, ngi na ka liang jong ka seng ngi kyrpad ïa ka Sorkar ba kan phai khmat sha ki bad ban pynurlong ïa ka jingdawa jong ki kaba ki dei hok ban ïoh,” la ong u Adviser ka seng.
“Nalor kata, haba phi peit ïa ka jingïoh ïa ka tulop jong ki, la isynei namar ka rit palat khamtam ha kane ka juk rem, te ngi kyrpad jur ïa ka Sorkar ban pynurlong ïa ka jingdawa jong ki,” u la ong.
“Ki nonghikai ki dei ka jingkyrmen na ka bynta ka lawei ki khun ki kti ki jong ngi, namar dei ma ki kiba hikai kiba pynstad ïa ngi, bad kumjuh ruh ïa phi ïa ngi, wat ïa ki MLA, Myntri, Myntri Rangbah ruh,” la ong u Bah Aiban Suchiang.
