Nongpoh, Nailur 25
Ha kawei na ki jingjia kaba la pynkyndit bad pynshongsyier ïa ki paidbah, uwei u heprit uba dang khyndai (9) snem ka rta, na ka shnong Bir u la lait salit na ka ka kti jong ki nongrah bor da ka jinglap kloi jong ki paidbah nongshong shnong kiba la mih paidbah ban leit wad ïa u.
Katkum ka tyllong khubor, la ïathuh ba katei ka jingjia ka dei ha ka 24 tarik u Nailur, 2025 ha ka por kumba 4 baje tam eiei janmiet katba ka kmie jong utei u heprit, ka dang phah ïa u ban leit shim ja sniang na ïing ka Meikha, kaba don marjan bad u khlem wan phai ïing shuh.
Na ka liang ka kmie jong utei u heprit, kala ïathuh ba kumba ju long man la ka sngi, ha kane ka sngi ruh kala phah ïa la u khun ban leit shim ja sniang na ïing ka Meikha bad wat hadien ba la pyrta ruh, um thie bad um wan phai. Kumta mar-mar kala pyntip sha la u lok bad ki nongïalam shnong, ha kaba ki paidbah nongshong shnong ki la ïamih ban leit wad ïa utei u heprit uba shu jah syndet.
La ïathuh ba ha katei ka jingwad shnong, la lap nyngkong ïa ka borti sniang bad dei tad haduh ka por kumba 6 baje tam ba la don uwei u rangbah uba lap ïa utei u heprit ha ka khlaw kaba marjan. La ïathuh ruh ba lap ïa utei u heprit hapdeng ka jingbym tip briew bad ba la tap ïa u da ki sla tyrkhong najrong bad pynpaw tang ki bynta jong ka durkhmat khyndiat.
Hadien ka jinglap, ïa utei u heprit la pynkit noh sha Umsning CHC na ka bynta ban phah khmih bniah bad la shem ba u don ka jingmynsaw kaba malu mala ha ki bynta jong ka kjat, kaba utei u heprit u la ïathuh ba u la shah iuh ha kita ki nongrahbor.
Halor kane ka jingjia, na ka liang jong ki bahaïing hasem utei u heprit ha ka janmiet jong ka sngi Palei ki la leit ban buh da ka ejahar ha thanad Umsning na ka bynta ban thwet bad kem ïa ki runar kiba la thmu ban dkhat jubor ïa ka jingim jong utei u heprit.
