Shillong, Nailur 25
U Samla Manbhalang Phankon u ba dei u nongwad Right To Information (RTI) ka Jylla, ha ka jingwad jingpynshai jong u lyngba ka RTI na ophis ka Hima Mylliem u la lap, ba ki don haduh 12 tylli ki khyrdop khrong khajna hapoh Ri-Bhoi District ba la pynïeng da ka ophis jong u Syiem ka Hima Mylliem bad ka Dorbar.
Kane ka jingwad RTI jong u Samla Manbhalang Phankon ka dei hadien ba u Executive Member ka KHADC u Bah Powell Sohkhlet u la pynshai ba ki don tang 3 tylli ki khyrdop khrong khajna jong ka KHADC ha Ri-Bhoi District, hadien ba ka kynhun ki nongñiah trok ki la kam ba ki don haduh 16 tylli ki khyrdop khrong khajna ha Ri-Bhoi.
U Samla Manbhalang u la ïathuh ruh ba ïa ki kali heh ki shim khajna kumba T.200 shisien ïaid, ïa ki kali rit ki shim T.100 bad ki kali ba kham rit ki shim T.50 shisien ïaid.
Nalor kata, u ong ba lada kine ki kali ki ïaid 3 ne 4 sien na kine ki khyrdop lum khajna, ki hap beit ban siew ïa ka khajna.
Shuh-shuh u la ïathuh ba naduh u snem 2022-2025, ka jingïohlum na ka bai khrong khajna ka long haduh T.63.28 lak.
Ha kaba ïadei bad kane, na ka liang u Samla Manbhalang u la buh jingkylli ruh ba hato ka Hima Mylliem ka ïoh jingbit ne-em ban buh khyrdop khrong khajna ha Ri-Bhoi ne na ka District Council, ne ka ïoh ne em ïa ka NOC na ka tnad PWD ne na ki bor district ruh.
“Kane ka jingmih ki khyrdop khrong khajna kam don kano-kano ka jingpynïoh nong ïa ki paidbah ka Jylla, hynrei ka i kumba ka kjit kylla na u paidbah,” la ong u Samla Manbhalang.
Kumta u la ong ba na ka liang jong u, bad ka kynhun un sa ujor sha KHADC bad sha ka tnad District Council Affairs ha kaba ïadei bad kane.
