Shillong, Nailur 25
U Nongïalam ka Liang Pyrshah ha Khasi Hills Autonomous District Council (KHADC) Bah Titosstarwell Chyne u la ong ba ki MDC kiba shong ha ka liang pyrshah kin sa shong pyrkhat haba ïadei bad ka jingjied thymmai ïa u Chief Executive Member (CEM) hadien ba u Bah Shemborlang Rynjah u la iehnohkam namar ka jingban ka jingshitom.
U Bah Titos u la ong ba ki MDC ka Liang Pyrshah kin sa shong pyrkhat la kin pynïeng kyrtong ne kin ym pynïeng, kin sa shim rai ynda la pynbna ïa ka tarik ban jied ïa u CEM ba thymmai.
U Bah Titos u la kitbok ruh ïa u Bah Shemborlang Rynjah ba un ïoh noh ïa ka met kaba koit ba khiah bad ba shait ba khlain noh, hadien ba u la u phah shithi iehnohkam da kaba pynpaw ba um don ha ka met kaba koit ba khiah.
Haba kylli la ka don ne em ka jingktah ïa ka council lada bujli CEM tang hapoh hynñiew bnai, u la ong ba um don jingsngewpher shuh namar la bunsien la ïa bujli CEM tang katto katne bnai ha kine ki snem ba la dep.
Kumban shu pynkynmaw u Bah Shemborlang Rynjah u la shimti kum u CEM ka KHADC ha u bnai Rymphang 2025 hadien ba ka VPP ka la synshar marwei hynrei tang hapoh hynñiew bnai u la phah shithi iehnohkam kaba u la aiti ïa ka shithi sha u Chairman ka KHADC ha ka 24 tarik Nailur 2025.
Na ka liang u Chairman ha kajuh ka sngi u la pyntip sha u Lat ka jylla.
