Shillong, Nailur 25
U Myntri ka tnad Food Civil Supplies & Consumer Affairs bad ka tnad Labour Employment & Skill, u Bah Methodius Dkhar u la pynpaw ïa ka jingsngewnguh ïa u Myntri Rangbah ka Jylla, u Conrad K. Sangma uba la kynthup lang ïa u ha ka Kynhun Myntri bad kular ba ka jingthmu ba kongsan jong u ka long ban pyntikna ba kine ki tnad treikam ki shakri hok ïa ki paidbah ka Jylla, khamtam ha ka kyrdan jong ki shnong ki thaw.
“Nga pynpaw ïa ka jingsngewnguh ïa u Myntri Rangbah ka Jylla uba la kynthup lang ïa nga ban don ha ka Kynhun Myntri bad ïa ki nongïalam ka seng jong nga kumjuh ki nongkitkam lem bad ki paidbah na ka konstitwensi jong nga,” la ong u nongthaw aiñ ka HSPDP na Mawshynrut.
U Bah Dkhar uba la shah bynshet kam ruh ban khmih ïa ka tnad Registration & Stamps, bad ka tnad Cooperation, u la ïathuh ha ki nongthoh khubor ba u kwah eh ban don ka rukom treikam kaba kynthup lang.
“Nga kwah shisha ban don ka rukom treikam kaba kynthup lang ïa baroh, ha kaba ngan don ka jingïalang khmih bniah kaba biang bad ki ophisar jong ki tnad treikam. Kumta, nga kwah ban don ka jingïalang khmih bniah bad ki bad nangta ngan sa peit kaei kaba biang eh kaba ngi lah ban leh kum ka tnad ban shakri kyllum ïa ki paidbah,” u la ong.
Une u Myntri thymmai u la ban jur ruh halor ka jingdonkam jong ka jingïasnohktilang bad jingïatreilang hapdeng baroh ki nongshim bynta, kynthup ïa ki ophisar bad ki nongtrei, khnang ba ka tnad kan ïoh ïa ka jingjop.
Haba ïadei bad ka tnad Labour, u Bah Dkhar u la ong ba donkam ban khmih bniah ban pynkhlaiñ ïa ka jinglah jong ka tnad ban ïada ïa ka bha ka miat jong ki nongbylla bad ki nongai kam kumjuh.
U thmu ruh ban bishar bniah ïa ki mat treikam ba mynta, ban pynithuh ïa ki jaka ban pynbha, bad ban pyrkhat ïa ki jingpynkylla bathymmai ban pynbha ïa ka jingtreikam jong ka tnad.
Halor ka mat jong ki nongtrei bylla be-aiñ hapdeng ki Jylla, u Myntri u la kubur ba kane ka long kaba kongsan bad ong ba u thmu ban pynlong ïa ka jingïalang khmih bniah bad ka tnad ban sngewthuh ïa ki sienjam ba la shim haduh mynta bad ban wad ïa ka lynti kaba bha tam ban ïada ïa ka bha ka miat jong ki paidbah ka Jylla, ha ryngkat ka jingpyntikna ba ki kam kiba dang ïaid (jingtei) kin ym shah pynthut.
“Kane ka long kaba kongsan bha kumba ka long mynta namar ba ki don shibun ki mat kiba la mih hashuwa bad ha kine ki bnai ba la dep, ki don shibun ki mat kiba la mih shaphang kane bad halor kane ka sobjek ba kyrpang – nga kwah ban don biang ïa ka jingïalang khmih bniah bad ka tnad ban tip kaei kaba ki la leh ha kine ki khyndiat bnai ba la dep bad kiei ki sienjam ba la shim ban ïada ïa ka bha ka miat jong ki briew jong ngi bad ban ym ktah pat ïa ka kam kaba hangne mynta.”
Haba kylli shaphang ki jingkhmih lynti, u Bah Dkhar u la pdiang ba ki long kiba heh hynrei u la pynpaw ïa ka jingangnud jong u ban leh ïa kaba bha tam da kaba ïasnohktilang bad ïatreilang bad ki nongshim bynta.
