Shillong, Nailur 25
Ka jingïakhih jong ki nonghikai kiba don hapoh ka shatri jong ka Federation of All School Teachers of Meghalaya (FASTOM), ka la ïaid la saw sngi lynter mynta, ha kaba ki la rai ban bteng beit ïa ka jingïakhih da kaba shong kyllaiñ mungor khlem buh por ha madan Malki, haduh ba ka Sorkar Jylla kan sngap ïa ki jingdawa ban kyntiew ïa baroh ki skul Adhoc sha ka deficit system.
Ïa kane ka rai la shim hadien ba ka kynhun ka la dep ban ïakynduh dang shen ïa u Myntri ba khmih ïa ka tnad pule puthi ka Sorkar, u Bah Lahkmen Rymbui, ha kaba u la ong ba ka Sorkar kan hap ban peit bniah shwa baroh bad ïa ki jingai jingmut, ha kaba ïadei ban pynbeit ryntih ïa ki skul hapoh ka Jylla shwa ban shim ïa ka rai.
Haba kren sha ki lad pathai khubor, u Vice President ka FASTOM u Bah Sanborn Jungai u la ong ba ka jingtyrwa ïa ka Meghalaya Education Grant (MEG) ka dang dei ha ka rynsan ba dang lung bad ki nonghikai Adhoc kam long kaba shai bha ban pyntreikam noh.
“Kum ki nonghikai Adhoc, ngim don ka jingtip bha la kin pyntrei kam ne-em ha ka sngi kaba kut. Kumta ngin ïeng beit ha ka mat jingdawa ban kyntiew noh ïa ki skul Adhoc sha ka Deficit System ne Deficit Pattern”, u la ong.
U Bah S Jungai u la pynpaw ruh ïa ka jingbitar halor ka jingbym ïoh ïa ka jingpyntip kaba biang na ka Sorkar Jylla, watla ki la dep ban phah haduh hynriew sien sha ka ophis jong u Myntri Rangbah ka Jylla ïa ka jingdawa.
“Ngin bteng beit ïa ki jingdawa jong ngi, tad haduh ba u Myntri Rangbah un da jubab,” u la ong.
U Bah S.Jungai u la pynpaw ba bunsien la kdew ba ka jingeh halor kine ki jingdawa kadei beit halor ka jingbym don ïa ka pisa ka tyngka ba ym shym la lah ban shimkhia ïa ka jngdawa ki nonghikai Adhoc.
“Ngi tip shai kawei ka long, ba lada ka Sorkar ka don ïa ka mon, ngam tharai ba kan don kano-kano ka jingeh haba ïadei bad ka pisa tyngka,” la bynrap u Bah S.Jungai.
U Vice President u la ong ruh ba ka kynhun ka dawa beit ba dei ban ïoh ïa ka jingkular ha ryngkat ka jingthoh na ka Sorkar Jylla, ba ki nonghikai Adhoc kin ïoh ïa ka jingsiew kaba biang ne ka basic pay bad kiwei pat ki jingmyntoi ne allowances.
Haba ïadei pat bad ka jingïalang bad u Myntri ka tnad pule puthi u Bah Lahkmen Rymbui, u la ong ba ka Sorkar kan hap ban pule bha shwa bad ban peitbniah shwa ïa baroh bad ka jingai jingmut jong baroh kiba don bynta lang kiba la shah tyrwa bad pynbeit ryntih ïa baroh ki skul. U Bah S Jungai u la ong ba ki nonghikai kim lah ban ap sah ïa ka rai ka Sorkar.
“Namar kata, kaei ba ka kynhun ka kwah ka long ba ka Sorkar ka dei ban ai da ka jingthoh, ba kin ai ka jingsiew kaba biang bad kiwei-kiwei de ki jingmyntoi. kane kadei ka nongrim ba ngi ïeng,” u la bynrap.
U nongïalam ki nonghikai u la ong ba ka kynhun ka kyrpad ïa u Myntri ka tnad pule puthi bad ïa u Commissioner & Secretary ban pynsngew sha u Myntri Rangbah ba ki nonghikai Adhoc ki dang ap ïa ka rai jong u.
Lah ban kdew, ka tulop jong ki nonghikai Adhoc ka long T.18,000 ïa ki Lower Primary, T.22,000 ïa ki Upper Primary, T.29,000 ïa ki Secondary, T.31,000 ïa ki nonghikai Science, T.33,000 ïa ki Higher Secondary.
